Марий Элыште Кугурак тукымлан вашмутланыме икымше рӱдерым тений январь мучаште Параньга посёлкышто торжественно почмо. Тылеч вара тушто 234 пенсионер лийын.
«Рӱдерын тӱҥ задачыже районысо илалше еҥ-влакын яра жапыштым пайдалын эртараш йӧным ыштыме дене кылдалтын. Да ме тидын шотышто, чынжымак, чыла ыштена: спорт мероприятий, мастер-класс-влакым, художественный самодеятельность-шамычын концертыштым эртарена», – палемда Россий Федераций Социальный фондын Марий Элысе пӧлкажын управляющийже Владимир Орехов.
Рӱдерыш коштшо-шамычлан шашке дене турнирым, йӱдвел ошкылмаш дене мастер-классым организоватлыме. А пӧръеҥ-влак, командым чумырен, волейбол дене йолташле матчлаштат участвоватленыт.
23 февральлан да 8 Мартлан концертым шындыме. Туштыжо Параньга посёлкышто илыше уста еҥ-влак мурым муреныт, почеламутым лудыныт, семӱзгарым шоктеныт.
Поснак Элым аралыше-влакын кечышт ушеш кодын. Пайрем ӱстелтӧрыштӧ чайым йӱын шинчыме годым пӧръеҥ-влак армийыште служитлыме жапыштым шарналтеныт, а ӱдырамаш-шамыч – йӧратыме таҥыштым салтакыш ужатымыштым, серышым возымыштым да чытен-чытыде вучымыштым.
Мо оҥайже: рӱдерын мероприятийлаштыже пенсионер-влак веле огыл, нунын уныкаштат участвоватлат. Ӱдырамашын тӱнямбал кечыж вашеш «Мыйын авам ден ковам эн сай улыт» темылан йоча сӱрет ончерым организоватлыме, да рӱдерыш коштшо шуко еҥлан шке портретшым тӱткын ончаш, икгайлыкым кычалаш йӧн лийын.
Рӱдерыште сотемдарыме шотан мероприятий-влакат эртат. Правовой аспектыште пенсийын верже нерген ликбез ден черле йыжыҥым хирургический операций йӧн дене эндопротезироватлыме нерген онлайн-вебинар кажнылан келшен.
Илалше еҥ-влакым ончыкыжымат шуко оҥай да пайдале мероприятий вуча. Нуным эртараш палемдыме кече ден жапым Россий Социальный фондын Параньга районысо клиент службыштыжо да сайтын регионысо лаштыкыштыже рашемдаш лиеш.
М.ИВАНОВА
Фотом интернет гыч налме
