Марий Элыште шошымсо вӱдшор пагытлан ямде улыт.
Россий МЧС-ын Марий Элысе управленийжын пресс-службыжын увертарымыж почеш, республикыште вӱдшор апрель кыдаллан логалеш. Пытартыш ийласе деч тудо утыжым ойыртемалтшаш огыл. Игече иканаште чотак левешта да йӱр тӱҥалеш гын веле, вӱдшор талышнен кертеш. Но утарыше-влак чрезвычайный ситуаций лийшаш огыл маныт.
А тыгай сӱрет лиеш гын, марий рӱдоласе Клара Цеткин уремысе, Луговой изуремысе да Какшан проездысе вич, Якимово ялысе 8, Нолько посёлкысо 9, Куяр поселкысо 32 пӧрт вӱдыш каен кертыт.
Курыкмарий районысо Кум Рутко ял да Звенигово районысо Кокшайск посёлкышто 6 пӧрт, тыгак тусо «Волгарь» сад товариществын 11 участкыже шотышто лӱдыкшӧ уло. Сандене нунын озашт ты пагытлан ончылгоч ямде лийшаш улыт. Пӧрт воктене канавым ыштыман, ийым, лумым кораҥдыман. Подвал ден пӧртйымач чыла кӱлешан арверым ончылгоч лукман, первый полышлан кӱлеш лийше вургемым, кочкышым, вӱдым, чиемым ямдылыман. Тиде жапыште газетысе, телевидений ден радиосо увер-влакым эскерыман, телефоныштат зарядке ситыше лийшаш. Тыгак илыме верым кудалтен, жаплан ойырымо оралтыш куснаш ямде лийман. Пӧртым коден кайыме деч ончыч электричествым йӧрташ, сурт вольыкым, пий ден пырысым эвакуироватлаш йӧнан лийже манын, ончылгоч шоналтыман.
С.Носова
