Марий Элыште – муниципал форум: кучем ден чолга еҥ-влак кокласе вашкыл.
Йошкар-Олаште районласе мер шкевиктем да калык дружине-влакын представительыштым, ялвуй ден илемласе чолга еҥ-шамычым иквереш чумырышо Республикысе муниципал форум кумшо гана эртен. Тиде мероприятийыште верысе шкевиктемым вияҥден колтымо йодышлам лончылаш, икте-весым опыт дене палдараш да яллаште илышым саемдыме нерген вашла мутланаш йӧн лийын.
Форумышто Кугыжаныш Погынын президиумжын йыжыҥъеҥже, парламентын социальный политике, тазалык аралтыш да ветеран-влакын пашашт шотышто комитетын председательже Наталья Козлова пашам ыштен.
Старосто-шамычын институтышт ден ТОС-влак ял кумдыклам арален кодымаште да вияҥдымаште кугу верым налыт, погынышо-шамыч ончылно выступатлымыж годым палемден депутат. Парламентарий законым ямдылен лукшо органым вуйлатыше Михаил Васютинын лӱмжӧ дене участник-шамычлан мер пашам шуктымыштлан, шочмо верым вияҥдаш тыршымыштлан да калык дене пашам ыштыме пайдале йӧным чарныде кычалмыштлан тауштен.
«Иктат ялвуй але ТОС председатель шочын огыл, да тидлан тендам нигӧат нигуштат туныктен огыл. Те чарныде азапланеда: кузе пошкудо-шамыч да ял калык дене пеҥгыде кылым ышташ, кузе кундемыш ешартыш оксам кондаш, кузе кажне еҥлан шке мландыштыже оза улмыжым умылтараш… Тиде паша йӧршынат проста огыл, но моткоч кӱлешан», – палемден Наталья Козлова да муниципал форумым поро йӱлаш пуртымылан, тудым кажне ийын эртараш тӱҥалмылан ӱшанымыжым ойлен.
Парламентарий поснак кугу тӱткышым ял кумдыкым арален кодымо йодышлан ойырен.
«Тидын дене пӱтынь мландым арален кодымо тӱҥ-вож кылдалтын, шонем. Ялнан ончыкыжым кузе вияҥшашыжым, икте-весе коклаште лачшымак могай кылым чоҥышашым шке гына решатлен кертына. Тунемаш, тидым кузе ыштышашым пырля лончылаш тӱҥалына гын, ял – Российын чонжо – мемнан иквереш чумырымо куатна дене аралалт кодеш», – манын парламентарий.
Наталья Козлова форумын участникше-шамычлан калык велым умылымашым да полышым, ик семын шонышо шукырак еҥым да суапле пашаште у сеҥымашым тыланен.
Награде-влак дене палемдыме торжественный церемонийыште депутат Морко район Эҥерсола ял старосто Татьяна Гавриловалан Марий Элыште верысе да мер шкевиктемым вияҥдымашке кугу надырым пыштымылан ТОС общероссийский ассамблейын Чап кагазшым кучыктен.
Ассамблейын Таумутшо дене тыгак Медведево районысо «Руш Кукмарий Актуганово урем» ТОС-ын председательже Дмитрий Васинов, Советский район Кугунур ял старосто Сергей Григорьев, Параньга район Штрамарий ял старосто Андрей Ильин, Кужэҥер район Марий Шой ял старосто Нина Лебедева, Волжский округ Кичиер посёлкын старостыжо Николай Николаев палемдалтыныт.
Мероприятийыште Кугыжаныш Погынын бюджет да экономический политике комитетшын председательжым алмаштыше Дмитрий Груздев лийын. Тудым Марий Элысе Элгӧргӧ паша министерстве общественный порядке ден лӱдыкшыдымылыкым эскерыме пашашке шке надырым пыштымылан Таумут дене палемден.
Маргарита ИВАНОВА.
Марий Эл Кугыжаныш Погынын пресс-службыжын фотожо.
