Организацийыш страховой взнос кӱшеш маскым, перчаткым да санитайзерым налаш лийме нерген колынам. Тиде чын мо?
Н.Косолапова
Волжск ола
Йодышлан Марий Элын Социальный вияҥмаш министерствыжын пресс-службыштыжо тыге вашештеныт:
— 2020 ийыште шижтарыме мере-влак радамым кумдаҥдыме, да пашам пуышо тудын роскотшым страховой взносын суммыжо кӱшеш пӧртылтен кертеш. Россий Минтрудын палдарымыж почеш, пашаеҥ-влаклан пандемий пагытыште паша верыштышт лӱдыкшӧ ынже лий манын, тиде радамыш маскым, перчаткым, термометрым да санитайзерым пуртымо. Келшыше кӱштымашым РФ Юстиций министерствыште регистрироватлыме.
Компенсацийын кугытшо – организацийын 2019 ийлан ойырымо страховой взносшо деч 20 процент марте. Уэмдыме радамыш нине мероприятий-влакым пуртымо:
• шӱлымӧ корным аралыме средствым, шӱргӧ щитокым, бахилым, противочумный костюмым, ик гана чияш лийме халатым налмаш;
• пашаеҥ-влаклан кидым обработатлашышт дезинфицироватлыше коваште антисептикым да дозироватлыше устройствым налмаш;
• транспорт средствым, материалын транспорт упаковкыжым, оборудованийжым, продуктым, служебный помещенийым, кид дене логалме ӱмбал лончым обработатлыме дезинфицироватлыше средстве ден устройствым, тыгак юж рециркуляторым налмаш;
• пашаеҥын капкыл температуржым тергыме устройствым налмаш;
• пашаеҥ-влакын биоматериалыштым COVID-19 дене черланен кертмылан лабораторий йӧн дене тергыктымаш.
Шижтарыме мере-влакым финанс велым шуктымо нерген йодмашым верысе Социальный страхований фондыш 2020 ий 1 октябрь марте пуэн шуктыман.
М.ИВАНОВА
