Марий Элыште Сеҥымаш кече Йошкар-Оласе Марково шӱгарлаште Кугу Ачамланде сарын участникше-влакым шарнымылан пӧлеклалтше митинг дене тӱҥалын.
Тиде мероприятийышке регионым вуйлатышын советникше Евгений Кузьмин, Йошкар-Ола округын вуйлатышыже Лев Покровский, Йошкар-Ола да Марий митрополит Иоанн, шуко моло ушненыт.
Марково шӱгарлаште Кугу Ачамланде сарыште сусыргышо да Йошкар-Ола госпитальыште колышо 779 сарзым тойымо, эше ныл фронтовикым изиш варарак кондымо.
Тыштак – Совет Ушем Герой, лётчик Захар Семенюкын шӱгарже. Сар годым тудо южышко 400 утла гана нӧлталтын. Тыныс жапыште Марий кундемыште шахтный пусковой установкын ракетыже-влакым аралыше истребитель-перехватчик-шамычын полкыштым вуйлатен, мемнан денак 39 ияш ӱмыр лугыч колен.
Митингыш толшо-влак Кугу Ачамланде сарын участникше-шамычым ик минут шып шоген шарналтеныт, памятник воктек пеледышым пыштеныт. Митрополит Иоанн панихидым служитлен.
Маргарита ИВАНОВА.
Николай Селюнинын фотожо.
