Таче Йошкар-Оласе поликлинике-влакын фильтрышкышт мийыше пациент-шамыч кугу йöндымылыкыш логалыныт, нуно врач деке пурашлан урем гычак шуйналтше пеш кужу черетыште шогеныт. Икманаш, шкем тугакшат начарын шижше черле-влак ончыч йÿштыштö, а вара шыгыр да пич помещенийыште медикын полышыжым чытен-чытыде вученыт. Тидыже шукыштлан мучашдыме тамыкла чучын…
– Амал калыкын веле огыл, врач-шамычынат у коронавирус инфекций дене черланымышт дене кылдалтын, – умылыдымашым рашемдышт Марий Элын Тазалык аралтыш министерствыштыже. – Нелылык 20 январь гыч палдырнаш тÿҥалын: «вашкеполышым» ÿжыктымö чот 4-5 пачаш кугемын, врач-шамычым черле кугыеҥ-влакын мöҥгышкышт ÿжыктымö чот – 5-6 пачаш. Таче Йошкар-Олаште гына ОРВИ да у коронавирус инфекций дене черланен кертше 1100 йоча деке педиатр-влакым ÿжыктеныт. Черле-шамычын шукеммыштым, врач-влакын ситыдымыштым шотыш налын, тачак амбулаторий да поликлинике тöнежлаште плановый манме медицине полышым пуымым чарнаш пунчалме. Ярсыше врач-специалист-шамыч поликлиникылаште вес жапыш кусараш лийдыме экстренный полышым пуаш, тыгак черле-влак деке мöҥгышкышт кошташ тÿҥалыт.
Лишыл жап гыч Йошкар-Оласе поликлинике-влакын пашашкышт медицине вузлаште икымше да кокымшо ий тунемше 21 ординаторым ушат. Аккредитациян нине медик-влак педиатр да терапевт семын приёмым эртараш тÿҥалыт. Первичный звеном эше 20 ординатор дене вияҥдаш ямдылат. Марий кугыжаныш университетын да Йошкар-Оласе медицине колледжын кугурак курслаштышт тунемше студент-влакым поликлинике-шамычын колл-рÿдерыштышт пашам ышташ да «Системе-122» службым вияҥдаш ÿжыт.
Волонтёр-медик-шамыч инфекциян огыл хронический черан пациент-влаклан эмлыме препаратым кондыштараш тÿҥалыт.
– Пациентын пашам ыштен кертдыме нерген листшым ынде дистанционно петырат, – тазалык аралтыш системын у йöнжö дене палдарышт министерствын пресс-службыштыжо. – Эпидемий дене кылдалтше сÿрет умбакыжат начаремеш гын, пашашке вес медицине организацийла гыч тымарте первичный медико-санитарный полышым пуыдымо врач-шамычымат ушаш палемдыме. Таче кечылан ведомствын ик автомашинажат яра огеш шого, тылеч посна Йошкар-Оласе да районласе предприятий ден организций-влак дене медицине тöнеж-шамычлан полшаш ешартыш транспортым ушымо нерген ойпидышым ыштыме. Тазалык аралтыш министерстве лекше нелылыкым сутка мучко эскера да у коронавирус инфекций дене черланыше пациент-влаклан полышым лийме семын сайынрак пуаш йöным ышта.
М.ИВАНОВА
Фотом соцкылла гыч налме
