Авамын, Тошто Торъял кундемын шочшыжо, РСФСР культурын сулло пашаеҥже (1969 ийыште пуэныт) Мария Степановна Соколован, шочмыжлан 2 майыште 100 ий теме.
Тидын лӱмеш Тошто Торъял тӱвыра пӧртыштӧ шарнымаш вашлиймаш эртен. Тушто У Торъял район администраций вуйлатышын алмаштышыже Д.Волков, верысе администраций вуйлатыше Н.Широбоков, районысо книгагудо системым вуйлатыше Л.Крюкова поро мутым ойленыт. Районысо ветеран-влак ушем вуйлатыше Т.Бирюкован каласкалымыж годым эсогыл шинчавӱдшат лекте.
Авам 1948 ийыште Йошкар-Памаш библиотекыште пашам ышташ тӱҥалын да ты пашаште 32 ий тыршен. Тошто Торъял книгагудым вуйлатымыж годым тудын ойжо почеш ялсовет пӧрт гыч вес оралтыш кусненыт. Мария Степановна колхозник-влаклан книгам, газет ден журналым ферме ден комплекслашке, гаражышке, пасушко шкежак нумалын. Тӱрлӧ мероприятийым эртарен. 1964 ийыште книгагудылан «Библиотека отличной работы» лӱмым пуэныт. А «РСФСР культурын сулло пашаеҥже» чап лӱмым библиотекарь-влак кокла гыч районышто эн ончыч тудо налын.
Шарнымаш вашлиймаште тыгак З.Яндулова, З.Демидова, З.Егошина, Т.Прозорова, Ю.Соболева да молат авамым шарналтен ойлышт. Пеш сай концертым ямдыленыт. Авам Майя Романован, Мария Сапожникован, Светлана Строганован, Иван Смирновын мурымыштым пеш йӧратен. Меат, Мария Степановнан Галина (Петрова) ден Зинаида (Кочнева) ӱдыржӧ-влак, «Авайлан» мурым муралтышна, Йыван Кырлан почеламутшым йоҥгалтарышна. Районысо рӱдӧ библиотеке аванан илышыже да паша корныж нерген чапле выставкым чумырен.
Мыят, Ленинградысе институтын библиотеке факультетшым сайын тунем пытарымек, книгагудо пашаште тыршенам. Мария Степановна ойла ыле: «Мый пеш пиалан улам. Мыйын кум йочам да йӧратыме пашам уло!»
Аванам тыге шотлымыланда кугу таум ойлем, йӧратыме Тошто Торъял калыкем!
З.СОКОЛОВА (Кочнева)
Фотом еш альбом гыч налме
