«Журавушка» социальный реабилитаций рӱдерын отделенийыштыже Киндын тӱнямбал кечыжлан пӧлеклалтше пайрем эртен. Йоча-влак калыкмутым, ушан ойсавыртышым шинчымышт шотышто таҥасеныт, тыгак киндым икымше гана пыштыме, тудым ямдылыме йӧн, сорт-влак нерген шуко уым пален налыныт. Воспитатель-шамыч пайдале да оҥай презентацийым ямдыленыт. Тудын полшымыж дене йоча-влак ру дене шуктымо руаш гыч пыштыме кинде, «кинде терке», киндым коҥгаште кӱктымӧ йӧн, ложашан кочкышым ямдылыме секрет, кинде нерген оҥай факт-влак дене палыме лийыныт.
Мероприятий чайым йӱмӧ йӱла дене мучашлалтын. Туштыжо йоча-влак тӱрлӧ киндым тамленыт.
Ушештарена: Киндын тӱнямбал кечыже – самырык пайрем. Тудым Киндым пыштыше да кондитер-влакын тӱнямбал ушемышт шонен луктын. Кинде чыла калыкын тӱвыраштыже кугу верым айла. Арам огыл кажне элыште тудын нерген шуко калыкмут, ойсавыртыш улыт. Мутлан, кинде деч кугу от лий (марий калыкмут), когыльо ден ойго олмеш лучо кинде ден вӱд лийышт (руш калыкмут), сакыр шере гынат, киндым ок алмаште (немыч калыкмут)…
Кинде пайремым палемдыме кечымат айда-йӧра ойырен налын огытыл: 1945 ийыште лачшымак октябрь кыдалне ООН-ын шужен илыме ваштареш кучедалше Продовольственный да ялозанлык ассоциацийжым ыштыме.
М.ИВАНОВА.
