Марий Элым вуйлатыше Юрий Зайцев «Самырык профессионал-влак» X национальный чемпионатын призёржо-влак да нунын наставникышт дене вашлийын.
Ушештарена, тиде кугу таҥасымаште республикнан командыже тӱрлӧ компетенцийыште профессионализмым ончыктымыжлан шым медальоным сеҥен налын. «Те чонлан келшыше пашам ыштеда, тыгодымак моштымашым вияҥдаш тыршеда. Самырык профессонал-влаклан тыгай конкурс моткоч кӱлешан, тушто еҥ-влак профессионал могырымат, личность семынак шке верыштым пеҥгыдемдат», – палемден Юрий Зайцев.
«Марий Элын командыже ий гыч ийыш шукырак да шукырак медальоным сеҥен налеш. Эртыше ийлаште 2-3, эн шукыжо 4 дене конден гын, тений 14 участник гыч 7-ше медальон дене палемдалтын. Тидыже специалист-влакым сайын ямдылыме нерген ойла», – каласен образований да науко министрын пашажым шуктышо Лариса Ревуцкая.
Вашлиймаште Юрий Зайцев самырык жапыштыже производствышто тыршымыж нерген шарналтен. А Национальный чемпионатын ик участникше, «Промышленный механике да монтаж» компетенцийыште профессионализмым ончыктымылан медальоным сеҥен налше Николай Сорокин тыге каласен: «Таҥасымаште республикнан чапшым кӱшнӧ кучаш манын, уло моштымашнам ончыкташ тыршенна. Тау наставник-влаклан, нуно мыланна шуко шинчымашым пуэныт, опытышт дене палдареныт».
«Сеҥымаш дене саламлем. Ончыко гына! Мыланна, правительствылан, республиклан тыгай профессионал-влак кӱлыт. Мый виян команде верч улам!» – каласен Юрий Зайцев.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.
Д.Речкинын фотожо
