ЕШ ДА ИКШЫВЕ

Висвис сынан тортым тамлынеда?

Тамлынен ончынеда гын, таче, 8 июльышто, Еш, йӧратымаш да ӱшанле улмо кечын, Йошкар-Олашке Патриарший площадьыш толза. Тушто пайремын символжо – висвис пеледыш – сынан 500 килограмм нелытан да 5 метр кугытан тортым кӱэштыт!

Тудым «Теплая речка» трактирын вуйлатышыже ресторатор Иван Антропов шке командыж дене ямдылаш тӱҥалеш.

Але марте тыгай сынан да тыгай кугытан тортым Российыште иктат ыштен огыл. Сандене кӧ ты кечын площадьыште лиеш гын, исторический татыш – у редордым шындымашке – логалеш! А тидым «Достояние нации» тӱнямбал агентствын экспертше Маргарита Железнова ончаш да аклаш тӱҥалеш.   

Эше мо оҥайже: рашемдыме почеш, тиде бисквитан тортым марий калыкнан «Ӱяча» национальный кочкышыж дене сӧрастарат! Тидыже моткоч куандара!

А тиде увер чылаштынат кумылыштым путырак нӧлталеш, очыни: тиде тортым пайремыш мийыше кажне еҥ тамлен ончен кертеш! Дегустаций 18 шагатат пелылан тӱҥалеш. Тугеже вараш ида код!

Любовь Камалетдинова

 

Опубликовать в Одноклассники

Добавить комментарий