1 июнь – Йоча-влакым аралыме тӱнямбал кече. Тидын лӱмеш кажне ийын пӱтынь элыштына, республикыштына, кажне районышто чыла гаяк йоча ден тӱвыра учрежденийлаште, организацийлаште пайремым эртарат да икшыве-шамычлан кугу тӱткышым ойырат, нуным куандараш, кумылыштым нӧлталаш тыршат. Тидлан тӱрлӧ конкурсым, модышым, викториным, концертым ямдылат.
«Интеллектуал» тӱвыра-увер рӱдер гын (вуйлатышыже – Эльвира Куклина) партнер-йолташыже-влак дене пырля 1 июнь вашеш пайремым 27 майыштак эртарыш. Нунын коклаште «Саскавий» марий ӱдырамаш ушемнат ыле. Тушто «Авай, кече онча!» мероприятий лие. Тудо «Шочмо йылме авай дене пырля» проектын участникше-влаклан: 3-7 ияш йоча-влак ден аваштлан, тыгак тӱҥалтыш класслаште тунемше-влаклан – пӧлеклалте. Тыгодым пайремыште мастарлыкыштым тӱрлӧ ийготан да тӱвыра-увер рӱдерын проектлашкыже ушнышо ӱдыр-рвезе-влак ончыктышт. Мутлан, «КӱслеКыл» усталык рӱдерын чолга еҥже-влак аваж ден эргыже Татьяна ден Данил Анисовмытын кӱсле дене марий семым, эсогыл «Акпарсын маршыжым», шоктымышт келшыш. Алиса Ельсукова гын изи икшывыж дене пырля «Ший пӱян Ший Пампалче» йомакым моткочак устан модын ончыктыш. Тыгодым Татьяна Анисова тиде йомакым книга гыч лудо да жапын-жапын кӱслем шоктымыж дене сылнештарыш. Тыге йомак эшеат сӧралрак лие да йоча-шамычын кумылжым чотак савырыш.
А пӱтынь программым «Марий Аниматор» проектын ӱдыр-рвезыже-влак Дарья Юрьева, Елена Семёнова, Александр Кузьминых, Талвий Абрамов вӱдышт. Нунылан самырык этноблогер-влак Анна Александрова, Лиана Овчинникова, Софья Иванова-Ольховская, Софья Поворознюк тӱрлӧ рольым модмышт, мурым мурымышт дене полшышт. Нине ӱдыр-рвезе-шамыч шкештат погынышо йоча-влакым тӱрлӧ модыш дене модыктышт, куштыктышт.
Йоча-влакым шушаш пайремышт дене уна-влак: Марий Элын туныктыш да шанче министржын алмаштышыже Валентина Гаврилова, республикын Тӱвыра, савыктыш да калык-влакын пашашт шотышто министерствыжын пашаеҥже Вячеслав Комаров, «Саскавий» марий ӱдырамаш ушем вуйлатыше Людмила Кошкина да мый ушем вуйверын еҥже семын – саламлышна. Икшыве-влаклан ме «Муралте, авай, марий мурым» шепкамуро-влак сборникым, 24 мультурок ден 2 мультфильмым да лачка сийым кучыктышна.
Пайремыш Йошкар-Ола гыч веле огыл, тыгак Оршанке, Кужэҥер районла гыч икшыве-влак ачашт але авашт дене пырля толыныт ыле. Нине йоча-влак почеламутым поснак мастарын лудыч да пӧлек дене палемдалтыч. А пӧлекше ятыр ыле. Мутлан, Татьяна Зыкова Вячеслав Комаровын ик сылнымут корнылажым устан лудо, да автор шкеже тудлан автограф ден поро тыланымашан книгажым кучыктыш. Рӱдерын моло йолташыже-шамычат икшыве-влакым ятыр пӧлек дене куандарышт.
Тиде мероприятий, мыйын шонымаште, тушто лийше-шамычлан чылаштлан келшен. Молан манаш гын тудо оҥайын да веселан веле огыл эртыш, эше моткочак пайдале ыле. Мо шотышто? Пайремыш толшо ӱдыр-рвезе-влак кокла гыч чыланжак эше марла сайын мутланен огыт мошто, да сандене тыште чылажымат эн ончычак марла, а вара рушла ойлышт. Модмо годым, мутлан, мечым погымо жапыште, тудын тӱсшым марла ушештарышт. А ме палена: икшыве-шамыч йылмым куштылгынрак да сайынрак модшыла тунемыт. Сандене шочмо йылмым, тӱвырам арален кодымо шотышто пеш кӱлешан паша ышталте.
Пытартышлан меат икшыве-влакым шушаш Йочам аралыме тӱнямбал кече дене уло кумылын саламлена! Тек нуно ушан, шотан, виян, патыр, ача-аваштын, мемнан ӱшанле ончыкылык эҥертышна лийын кушкыт. Тек йоча пагытышт весела да пиалан лиеш! А ик эн тӱҥжӧ – тек вуй ӱмбалнышт яндар кава лиеш!..
Любовь Камалетдинова
Э.Куклинан фотожо
