Россий Пенсий фонд инвалид, илалше еҥ да йоча-влакын опекуныштлан выплатым пуаш тӱҥалын.
Тиде выплате тений апрель гыч июнь марте инвалид, илалше еҥ, тулык да ача-ава ончымо деч посна кодшо йоча-шамыч дене пырля илыше але нуным ончаш налше граждан-влаклан палемдалтеш. Правительствын пунчалже дене келшышын, тыгай опекун-шамычлан ончымо кажне еҥыштлан 12130 теҥге дене тӱлаш ыштыме.
Выплатым кугыжаныш да кугыжаныш огыл организацийын пашаеҥже-влакат налаш праван улыт, мутлан:
— социальный обслуживанийын стационар организацийлаж гыч, тыгак социальный обслуживанийын стационар огыл организацийлаштышт ыштыме стационар отделенийла гыч инвалид ден илалше еҥ-влакым шке деке илаш налше-шамыч;
— социальный обслуживанийын организацийлаже, тулык ден ача-ава ончымо деч посна кодшо йоча-шамычлан палемдалтше организацийла гыч инвалид, илалше еҥ, тулык да ача-ава ончымо деч посна кодшо йоча-влакым икмыняр жаплан шкеж деке илаш, ты шотыштак опекыш налше-влак.
Выплатым социальный обслуживанийын организацийлаже, тулык да ача-ава ончымо деч посна кодшо йоча-шамычлан палемдалтше организацийла гыч инвалид, илалше еҥ да йоча-влакым икмыняр жаплан шкеж деке илаш, тыгак опекыш налше волонтёр ден моло граждан-влакланат пуат.
Марий Элыште 54 еш утларак ямде улмо режим пагытлан йоча пӧртла да интернатла гыч 86 икшывым шкеж деке илаш налын. Нунылан средствам ойырымо нерген йодмашым Кугыжаныш услуго портал але Россий Пенсий фондын клиент службыж гоч 1 октябрь марте пуыман. Ешартыш документ огеш кӱл – выплатлан правам РФ субъектлан кучем органыштын чумырымо реестрышт почеш тергат.
Реестр-влакын ойыртемыштлан кӧра выплатым апрельлан, майлан да июньлан налашлан кок посна йодмаш кӱлеш. Тушто лӱмнерым, СНИЛС-ым да оксам налше гражданинын телефонжым ончыктыман.
Йодмашым вич паша кече жапыште ончат, оксам кум паша кече годым палемдат.
Социально полшымо вес мерылан правам палемдыме годым тиде выплате ешын доходышкыжо огеш пуро.
М.ИВАНОВА
