Виче кундемыште, марий школышто
Тиде кечылаште Виче кундем Пижанью районысо Вӱлэҥер (Марий Ошаево) школышто лийынна. Мемнам эн ончычак тудым 1975 гыч 2014 ий марте вуйлатыше, Россий образованийын почётан да Марий Эл тӱвыран сулло пашаеҥже, верысе чолга еҥ Владимир Унженин ден кызытсе директор Татьяна Торопова порын вашлийыч.
– Школыштына 27 тунемше шинчымашым пога, – ойла тудо. – Латик педагог пашам ышта. Кызыт мемнан йот йылмым туныктышна уке. 5-9-ше класслаш коштшо-влак марий йылмым арняште ик шагатым тунемыт, а тӱҥалтыш класслаште– урок деч вара. Шочмо йылмылан нуным Лилия Ивановна Русинова шӱмаҥда. А шкеже тудо – Шернур кундемын ӱдыржӧ. Тиде школыш тудо 1992 ийыште Крупская лӱмеш Марий пединститутым тунем лекмеке, пашам ышташ толын.
Палемдыман, ты тунемме вер тоштерже дене чаплана. Тудын дене мемнам историйым туныктышо, тоштерлан вуйын шогышо Аркадий Чирков палдарыш. Аркадий Александрович тиде кундемыштак шочын, туныктымо пашаште 43 ий тырша.
Тоштерыште школын историйже, верысе чолга еҥ-влакым ончыктымо, тӱвыра да спорт дене кылдалтше материал, экспонат-шамыч улыт – чылажымат туныктышо да тунемше-влак чумыреныт. Ик ял воктене эсогыл мамонтын лужымат муыныт улмаш, тудыжым вара Виче оласе геологий тоштерлан пуэныт.
– Тек йоча-влак шочмо кундемышт нерген изинекак палат. Марий йылмым 1990 ий гыч туныкташ тӱҥалме, – мутланымашкына Владимир Унженин ушныш.
– Тидлан тӱҥалтышым Владимир Васильевич Унженин ыштен, – Аркадий Александрович кугешнен палемдыш. – Лач тудын тыршымыжлан кӧра мемнан йоча-влак марий йылмым тунемыт да шинчымашым Пыжанью район кӱкшытыштӧ, тыгак Йошкар-Олаште эртыше олимпиадылаште ончыктат
М.СКОБЕЛЕВ
Авторын фотожо
