27 июль – 3 августышто Куяр посёлкышто, Самырык-влакым военно-патриот шӱлышеш шуарыме «Авангард» рӱдерыште, Финн-угор калык-влак гыч лекше йоча да самырык-влакын тӱнямбал лагерьышт эрташ тӱҥалеш.
Тудым Марий Элын Молодёжный политике комитетше, «Эр вий»-«Юная сила» йоча да ийготыш шудымо-влакын организацийыштын ушемже иквереш эртарат. Мероприятийын тӱҥ шонымашыже – финн-угор калык-влакын йӱлаштым ылыжтен да шымлен толмо негызеш самырык тукымын чон поянлыкшым кушташ. Лагерьын участникше-влак 12 гыч 18 ияш ӱдыр-рвезе-влак лийыт. Нунын коклаште йоча фольклор ансамбльыш, калык промысел студийыш коштшо, самырык краевед, этнограф, йоча мер организацийын представительже-влак лийыт. Икте чылаштым уша – нуно Российыште илыше финн-угор калык-влакын тӱвыраштым арален да вияҥден толшо программылаште участвоватлат.
Тений лагерьыш 120 икшыве толшаш. Нуно Карелий, Коми, Мордовий, Татарстан, Удмуртий республикла, Пермь кундем, Киров ден Ленинград областьла гыч лийыт.
Лагерьын программыштыже «Финн-угор, кӧ ме улына?», «Калык ойпого», «Финн-угор калык модыш ден куштымаш-влак». «Калык семӱзгар-влак» занятий-шамыч эрташ тӱҥалыт. Нуным мучашлыме годым ӱдыр-рвезе-влак модыш йӧн дене зачётым кучат да университетым пытарыме нерген дипломым налыт.
Йӱла почеш делегаций-влакын кечыштым, калык модыш фестивальым, промысел ярмиҥгам, калык-влак кокласе келшымаш кылым пеҥгыдемдаш полшышо тренингым эртараш палемдыме.
Лагерь жапыштак Туризм фестиваль лиеш. Тудын кышкарыште участник-влак шке муниципал район але олан сылне верлаж дене палдарыше турист маршрутым але интерактивный экскурсийым эртарат. Тыгак ӱдыр-рвезе-влаклан организатор-шамыч экскурсионный программым ямдыленыт. Нуным Марий тӱр рӱдерыш, Т.Евсеев лӱмеш национальный тоштерыш, «Кугу Какшан» заповедникыш да «ЗаАзъяково» экофермыш коштыктат.
Ушештарен кодыман, икымше гана тыгай лагерьым Россий кӱкшытыштӧ 1991 ийыште Марий республиканский пионер организаций эртарен. Тӱрлӧ ийлаште лагерьын пашашкыже Венгрий, Финляндий, Эстоний, тыгак Россий Федерацийын финн-угор калык-влак илыман субъектлаж гыч (Марий Эл, Мордовий, Татарстан, Удмуртий, Карелий, Коми республикла, Пермь кундем, Ханты-Манси ден Ямал-Ненец автоном округла, Киров, Ленинград, Нижегородский, Свердловск областьла) делегаций-влак ушненыт.
Лагерьын программыже кӱкшын аклалтын. Тудын негызеш грант кӱшеш шым проект илышыш шындаралтын. Шийвундым М.Кастрен лӱмеш Финляндийысе обществе (1991 ий), РФ Образований министерстве (2001 ий), Марий Элын Президентше (2003 ий), «Марий Эл» социал да тӱвыра проект-влакын ярмиҥгашт (2004, 2016 ийла), Самырык-влакын пашашт шотышто федерал агентстве (2018 ий) да Россий президент грант фонд (2019 ий) ойыреныт.
С.Носова
Фотом «Авангард» рӱдерын соцкыл лаштыкше гыч налме.
