20-22 декабрьыште Хант-Манси автоном округышто калык кокласе «Финно-Угрий студенчествын миссше-2021» IX конкурс эртен. Участник-влак радамыште Марий Кугыжаныш университетын студенткыже Анна Гурина ден Екатеринбург оласе Урал кугыжаныш лесотехнический университет гыч марий ӱдыр Диана Андреева лийыныт.
Анна Йошкар-Олаште шочын-кушкын. Кызыт МарГУ-н Калыкле тӱвыра да тӱвыра кокласе коммуникаций институтыштыжо кумшо курсышто хореографлан тунемеш.
– Конкурс дене ик жапыште «Креативный экономикыште финн-угор ужаш, Travel-журналистике-2021» семинар лийын. Ты мероприятийышке Марий кундем гыч толшо делегацият ушнен. Мылам полышкалаш толшо-влаклан экскурсийым эртареныт, верысе калыкын тӱвыраже да йӱлаже дене палдареныт. Ты жапыште участник-влак пресс-конференцийыште лийыныт, репетицийым ыштеныт. Кокымшо кечын тӱрлӧ мастер классым эртараш кӱлын. Мый таҥасымаште шун гыч марий Йӱштӧ Кугыза ден Лумӱдырым ышташ туныктенам.
Мероприятий шуко сай шарнымашым коден. Но эн тӱҥжӧ мый шке шочмо калыкем нерген каласкаленам да моло нерген утларак пален налынам. Кум кечыште ӱдыр-влак дене сай йолташыш савырныме. Гала-концерт годым вашла полышкалыме.
Моторлык конкурсышто калык ончыко марий Лумӱдыр семын лектынам. Вет тиде тӱжвал чурий денат, кӧргӧ порылык денат ойыртемалтше образ, – палемдыш А.Гурина.
Анна ты мероприятийыште «Мисс артистичность» номинаций дене палемдалтын. Урал марий ӱдыр Диана «Мисс медиа» номинацийыште сеҥен. А «Финно-Угрий студенчествын миссше-2021» лӱмым тений удмурт ӱдырлан пуэныт.
О.МОШКИНА
Фотом интернет гыч налме
