У Торъял районлан – 100 ий
ИП Гусева Е.Н.
«Весыным огыл, а шкенаным…»
Кызытсе рынке илышыште сатум ужалыме дене кылдалтше изи бизнес предприятий-влаклан кугу супермаркет сеть дене таҥасаш куштылго огыл. У Торъял районын тӱҥ индивидуальный предпринимательже Николай Александрович Гусев тидын нерген ончычак шоналтен да тергыме шот дене «Звёздный» сатулымо рӱдерыштыже ик залым шке кочкыш продукт кевытшылан, а весым «Магнитлан» ойырен. Тунам умылен: супермаркет дене таҥасымаште илыше кодаш эн ончычак верысе производитель-влаклан эҥертыман да нунын сатуштым ужалыман але мо кертмым шке ыштен лукташ тӱҥалман. Да мо шонеда, тудо когынекшымат кӱлешлан шотлен. Но ийгот погынымо семын тидым шкетын ыштен шукташ – манаш веле. Сандене кевыт пашам виктараш эргыже Антон Николаевичлан, производствым вияҥдаш ӱдыржӧ Елизавета Николаевналан ӱшанен. А шкеже чыла тидым контрольышто кучаш да нунылан йол ӱмбаке шогалаш полшаш шонен пыштен. Тачысе мутна производство нерген.
Предпринимательын производствыжат кевытше-влак семынак ик районышто веле огыл верланен. Эн ончычак Шернур посёлкышто вес предприниматель деч пекарньым налын. Тушто киндым гына пыштыме улмаш, а тудо кондитер изделийым кӱэштме пашамат виктарен колтен. У Торъял посёлкышто гын аптеке деч кодшо зданийыште цехым почын. Ончыч тушто тӱрлӧ кӧрган да кугытан когыльым гына кӱэштыныт, вара кылмыктыме пелефабрикат кочкышымат ямдылаш пижыныт. 2018 ийыште почмо нине предприятийлашке мый кум ий утла ончыч миенам ыле, сандене тылеч вара могай вашталтыш лиймым рашемдыме шуо.
– Тыште 2021 ий гыч пашам ыштем. Ончыч тыглай бухгалтер лийынам, а 2023 ий гыч директор да тӱҥ бухгалтер улам. Лектышнам таҥастарен ончалаш гын, сатунам ужалыме оборот ончылий тулеч ончычсо деч 15 процентлан кугемын, ӱмаште ончылийысе деч – 20 процентлан. Теве кузе кушкын толмо. Ме самырык озана Елизавета Николаевна дене коктын анализым ыштенна. Тудо Москваште РФ правительстве пеленысе Финанс университетыште тунемеш, кызыт тыште практикым эрта да диплом пашам воза. Тылеч ончычат производствыш толеден, интернет гочат кылым кучен шоген, отчётымат ышташ полшен. Бухгалтерий дене кылже пеҥгыде, – каласыш Екатерина Эриковна Королёва.
Нунын иктешлымышт почеш, кызыт киндым гына (шыдаҥ ден дарницкийым) тылзыште 60 тонным кӱктен луктыт, а булко изделийым (тушко тыгак когыльо, кекс, печенье, клендыр, пирожный, круасан пурат) – 25 тонным. Кеҥежым икымшыже 70 тонныш шуэш, кокымшыжо – 30-35 тонныш. А пелефабрикат изделийым (пельменьым, котлетым, зразым, сырникым, подкогыльым) февральыште 11,5 тонным ямдыленыт гын, кеҥежым 13-14 тонн лиеш. Эртыше ийласым эскерыме негызеш тыге аклен ойлат.
Шукынжо палынешт докан: могай у продукцийым лукташ тӱҥалыныт але ямдылалтыт? Пел ий утларак ончыч, мутлан, чыве шыл гыч котлетым да бургерлан тӱйымӧ шылан котлетым темленыт. Кодшо идалык мучаште У ий вашеш тортышт дене куандареныт. А тиде гана мийыме кечын иканаште икмыняр у изделийым дегустаций шотеш тамлен ончаш пиал логале. Заварной манме манме рудымо руаш гыч торык креман профитролим пурлалын, йылметым нелат. «Цезарь» пиццат пеш келшыш. Тудым ямдылаш яндар чыве шылым, соусым, сырым, черри помидорым да эше «Айсберг» манме салатым кучылтыт – чынжымак тутло. А сӧсна шыл да сӧсна ден ушкал шыл гыч ямдылыме купатышт супермаркетлаште темлыме деч палынак сайракла чучыч. Уэш-пачаш ыштен да терген ончымеке, нуным ужалымашкат луктыт. Да шке кевытлашкышт веле огыл.
– Предприниматель Гусевмыт ешын кевытше-влак У Торъял район мучко веле огыл, лишыл моло районыштат улыт. Но районлаште рынкым шарен колташ йӧн шукыжак огыл, сандене шке ямдылыме продукцийым ола велке утларак колташ тӱҥалме. Эше шукерте огыл продукцийнам Йошкар-Олаште икмыняр вере веле ужалат ыле, ынде ола мучко чыла гаяк микрорайонысо кевытлаште ужаш лиеш. Ме сату налшым эн ончычак натуральный продукт гыч да консервант деч посна ямдылыме кочкышна дене савырена. Сандене шкежат кевытыште весыным огыл, а шкенаным налына, – шылтыде каласыш Екатерина Эриковна.
А предприниматель еш оза Николай Александрович Гусев тидым пеҥгыдемдыме семын ешарыш:
– Калык налме сатум чыла шке ямдылаш тыршена. Тыге тудын рынке акшым иземдаш, а доходым кугемдыме негызеш пашаеҥ-влаклан пашадарым нӧлталаш да производствым вияҥден толаш йӧн лектеш. Лишыл жапыште Елизавета Николаевна район рӱдыштына ончычсо типографий зданийыште кулинарий да ямде кочкыш кевытым почеш. Кочкышым пелен налаш але туштак тамлаш вер лиеш. Вашке базыштына ешартыш пекарне почылтеш. Коҥгам да кӱлеш оборудованийым налме. Шернур гыч производствын ужашыжым кусарена, уке гын мӱгинде ден клендырым налаш У Торъял гыч тушко коштын толашат. Ынде нине кочкышым тыште ышташ тӱҥалыт. Сай продукций эре таҥасыме негызеш ышталтеш, маныт. Эсогыл ик организаций кӧргыштак. Кушто сайынрак ышташ тӱҥалыт, ончалына. Тыгай шонымашат уло.
А мо, сай шонымаш. Производствым саемден шарен толмо сайрак.
Юрий ИСАКОВ
Снимкылаште: индивидуальный предприниматель Е.Гусева; директор Е.Королёва; повар Э.Якимова; кондитер Р.Таныгина; кугурак кондитер Л.Иванова; пельменьым ыштат.
Авторын фотожо
