Кодшо кечылаште Марий Турек поселкысо В.П.Мосолов лӱмеш краеведений тоштерыште Майя Филиппован «А в садах бушует Май» фотографий-влак ончерже почылтын.
Тоштер вуйлатыше Раиля Мухаметханован палдарымыж почеш, выставке июнь мучаш марте шуйна.
Автор нерген кӱчыкын ойлаш гын, тудо ты районыштак Кӱшыл Мосара ялыште шочын. 11 класс деч вара МарГУ-н юридический факультетшым тунем пытарен. 2014 ий гыч Сколковошто резидентлан шотлалтше ик агентствыште юристлан пашам ышта. А яра жапыштыже моторлыкым войза.
– Фотографий-влакым шукертсек ыштем, но шуко да моторракын идалык утла ончыч шошым тӱҥалынам. Тидлан мемнан верысе сылне пӱртӱс кумылаҥден, – палдарыш фотосӱретче. – Мылам еҥ-шамычым Марий Элысе пӱртӱс лоҥгаште фотографироватлаш келша. Эн чотшо – йоча-влакым. Тыгодым тыглай фотографийым веле огыл ышташ, а йомак дене кылдаш, тидлан посна сюжетым шонен лукташ да келыштараш йӧратем. Келша ялысе теме дене кылдаш да, мутлан, памаш, эҥер воктене, ял уремыште, тошто пӧрт тураште … сниматлаш.
Ойлымыж почеш, шкенжын фотоончержым эртараш шонымашыже нигунамат лийын огыл.
– Тидым ышташ мылам тоштер вуйлатыше Раиля Мухаметханова темлен. Темлымаш келшен да вигак кӧненам. Молан манаш гын тиде – усталыкем, мастарлыкем да моштымашем аклымаш да сайлан шотлымаш. Тиде – мыйын икымше выставкем. Тудым кузе вераҥдыме да почмо мылам моткоч келшен, – палдарыш фотограф.
Выставкыш Майя Филиппован 80 пашажым ончыкташ лукмо.
– Шушаш кеҥежым могай фотосюжет-влакым ыштышаш шотышто шонымашем моткоч шуко. А такшым умбакыжат икшывына-влакым фотографироватлынем. Пелашем ден коктын (пелашыже – калыкыште Йорга каче семын палыме мурызо да самодеятельный автор Павел Филиппов – авт.) ме кок шочшынам, Даниил ден Эммам, ончен куштена. Эргына 8 ияш, а ӱдырна эше идалык да вич тылзаш веле. Пелашемлан чонем йодмо почеш шуктымо пашам келша, санденак, очыни, тудо мылам сай качестван чапле фотоаппаратым пӧлеклен, – шыргыжал палемдыш фотосӱретче.
Тиде келшыдеат огеш керт. Теве икмыняр пашажым (снимкылаште) ончен, нунын моткочак сылне улмыштым шкеат ужда, очыни!
Любовь Камалетдинова
Фотом еш альбом гыч налме
