Курыкмарий кундемын уста гармонистше, Россий культурын сулло пашаеҥже Арсений Яйцов «Жар-птица» телеканалыште ончыкталтше «Российын гармонистше-влак» передачын съёмкышкыжо миен коштын. Тудо Москошто Измайловский паркыште эртен.
А.Яйцовым тушко уста гармонист Александр Гайничев ден тудын пелашыже, мурызо Светлана Калачёва ӱжыныт.
А.Гайничевын Москошто «Руш гармонь» продюсер рӱдерже уло. Тудо концерт паша деч посна Российын тӱрлӧ кундемыштыже илыше гармонист-влак дене вашлийын мутлана да нуным калык ончыко луктеш.
– Съёмкышто тӱрлӧ семым шоктенам, муренам. Тусо калыклан марий муро поснак чот келшен, – кумылын пелештыш Арсений Яйцов да ешарыш: Александр ден Светлана мыйым июльлан Азов теҥыз воктеке ӱжыныт.
А.Яйцов ик кечат яра огеш шинче манаш лиеш. Тудо Козьмодемьянск олаш толшо теплоходым кажне гана вашлиеш да сылне семже, муро аршашыж дене калыкым куандара.
А.БАЙКОВА.
Фотом еш альбомжо гыч налме
