Ломбо, сирень але пызле тамле пушым йыр шарен, моторын пелед шогалыныт. Лач тиде пагытыште школлаште «Пытартыш йыҥгыр» эрта. Парт коклаште шинчыме жап ала-мынярлан шеҥгелан кодеш гынат, ты пайрем уш гыч садак огеш лек.
Йолташ-влак, школым тунемын лекме пагытдам шарнеда мо? Пырля тунемме йолташда-влак дене чӱчкыдын вашлийыда мо? «Пытартыш йыҥгыр» мо дене ушешда лакемалт кодын?
Денис РЫБАКОВ, «Красный Север» газетын журналистше:
– «Пытартыш йыҥгыр» пайремна 2000 ий майыште йоҥгалтын. Тиде кече класснан веле огыл, школын историйышкыже возалтын кодын. Ме ХХ курымышто Советский район Кодам кыдалаш школын пытартыш выпускшылан шотлалтына. 11-ше классым латик йоча – кум эрге да кандаш ӱдыр – тунемын лектынна.
Школ деч вара тӱня мучко шарленна. Йолташ-влак Италийыште, Москошто, Санкт-Петербургышто, Пензыште да Марий Элын тӱрлӧ районыштыжо илена. Ешем дене мыят ынде ятыр ий Салехардыште илем.
Пырля тунемме ӱдыр-рвезе-влак дене кажне вич ий гыч вашлиймашым эртарена. Теве уэш 2025 ий кеҥежым чумыргышаш улына.
Иван АНТОНОВ, «Марий Швейцарий» каныме базе вуйлатыше:
– Кужэҥер район Руш Шой школын 9-ше классшым 2007 ийыште тунемын лектынам. Классыштына латкокытын лийынна.
Школ деч вара тӱрлӧ вере илена, пашам ыштена: Кужэҥерыште, Йошкар-Олаште… Чаманаш кодеш, коктын ош тӱня дене чеверласеныт, а коктын кызыт Украинысе спецоперацийыште улыт.
Пырля тунемме йолташ-влак дене кажне ийын «Марий Швейцарий» каныме базыште вашлийына. Икте-весе дене ужын мутланыме, парт коклаште шинчыме пагытым да моло нерген шарналтыме кумылым нӧлтат.
Татьяна ЯМБЕРДОВА, этномузыковед, композитор, музыкант-исполнитель (Псков областьысе Великие Луки ола):
– Ме, республикнан тӱрлӧ районжо ден олаж гыч чумыргышо ӱдыр-рвезе-влак, 2000 ийыште Талантан икшыве-влаклан 1-ше №-ан школ-интернатым тунемын лектынна. «Пытартыш йыҥгыр» пайремым огыл, а куд ияш икымше классыш мийымым, икымше йыҥгырым пуымым сайын шарнем. Кугурак капкылан Саша лӱман рвезе, вачӱмбакше шынден, школ кудывече мучко коштыктыш.
Пырля тунемме ӱдыр Надежда Тайгильдина – эн йӧратыме йолташ ӱдырем. Кызыт тудо Малая Азия пелеотрошто ила. Надя эреак полшаш ямде, эн ӱшанле йолташ. Тудын дене Палантай лӱмеш музыкальный училищыштат пырля тунемынна.
Пырля тунемме ӱдыр-рвезе-влак дене кажне ийын кеҥежым, шочмо кундемыш ача-авам деке мийымем годым, вашлийына. Икте-весе дене ме ака-шӱжар, иза-шольо семынак лишыл лийын шуктенна. Шочмо кече але эше иктаж вес пайрем дене ваш-ваш эреак саламлена, кӱлеш годым кертме семын полшена. Икте-весын илышыже, сеҥымашыже да моло нергенат соцкыл полшымо дене эреак мутланена.
А.Байкова ямдылен
Авторын фотожо
