«Сеҥымаш тулсавыш» фестивальыште Республикысе Марий, Руш, Татар тӱвыра рӱдер-влак ик тичмаш программым ямдыленыт.
Тудым фронт гыч возымо серышла негызеш чумыреныт. Серыш-влак тӱрлӧ лийыныт: сӧй пасушто кредалше-влак чатлама йӱштӧ телымат, шокшо кеҥежымат, ночко шыже-шошымат чытен лекмышт, сеҥымашке шуаш тыршымышт, мӧҥгыштышт кодшо пелашышт, икшывышт верч колянымышт, йолташыштым йомдарымышт да моло нергенат. Серышла кокла гыч Марий Турек район Марий Пыламарий ял гыч Василий Андрианович Шубинын возымыжым (школ тоштерыште аралалтеш) лудын пуышт. Салтак пытартыш ныллымше серышыжым Сталинград ола гыч колтен. Военный полевой почтын данныйже почеш, сар жапыште фронт гыч куд миллиард серышым шӱдӧ утла йылме дене возеныт.
Концерт программым руш, марий, татар куштымаш да муро дене келыштарыме. Сарыш ужатыме сценке шинчавӱдым луктын.
Элнам осал тушман деч аралымаште тӱрлӧ калыкын шочшыжо-влак илаш-колаш кредалыныт да сеҥымашке шуыныт. Тидым кызытсе тукымат пала, шарна. «Тӱшкаште – вий!» – арам огыл калык тыге ойла, садлан пырля лийын гына, чыла нелым сеҥаш да илен лекташ куштылгырак.
А.БАЙКОВА
М.Скобелевын фотожо
