Марий Элыште чимарий-влакын кумалме ото-влакым кугыжаныш шулдыр йымаке налме. Нуно пӱртӱс памятниклан шотлалтыт, сандене кажне отыжо мыланна шерге. Кузе вара нуно аралалтыт?
Тидын нерген Марий Элын Тӱвыра, печать да калык-влакын пашашт шотышто министерствын кид йымалныже улшо Тӱвыра поянлык объект-влакым арален кодымо, пайдаланыме да оролымо шотышто управлений вуйлатыше Ааурика Михеева дене мутланенна.
— Аурика Ивановна, ото-влакым Марий Элыште гай жаплымаш Российысе моло регионышто укеат, очыни?
— Тыгеат манаш лиеш. Тачысе кечылан республикыште кугыжаныш учётыш 326 шнуй отым налме. Тидын шотышто Марий Эл правительствын пунчалже эше 1993 ийыштак лектын. Тыге ыштыме дене ме Юл кундемысе регионышто ик тыгай регион улына. Чаманен каласыман, 1992-1993 ийлаште ото-влаклан инвентаризацийым эртарыме материл чылажак аралалт кодын огыл. 2000 ийыште Юлтех университетын чодыра озанлык да экологий факультет вуйлатыше Александр Колесовын тыршымыж дене ото-влакым шымлыме паша угыч эртаралтын. Тунам эше 300 наре ото улмым рашемдыме. Ме кызыт тиде материал негызешак пашам ыштена. Молан манаш гын линейный объект-влакым проектироватлыме годым ты але вес вере ото-влак улмым шотыш налына. Тыгодым нуно кугыжаныш учетышто улмым але укем огына ончо. Мутлан, иктаж-могай объектым чоҥымо кумдыкыш ото логалеш гын, тудым арален кодашак тыршена. Медведево районышто газ пучым шупшмо годым тыге лийын. Кугуван ял воктенсе «Юмылтымо куэрла» отым тӱкыде кодымо, санденак пучым кок метр келгыт йымач колтымо.
Кумданрак — «Марий Эл» газетын
2017 ий 30 сентябрьыште лекше номерыштыже лудын кертыда.
Светлана Носова мутланен.
Фотом управленийын фондшо гыч налме.
