21-25 октябрьыште Сочи оласе «Бархатные сезоны» парк-отель кумдыкышто «ПРОфессионалыРФ. Калыкле политике» самырык-влаклан Российысе межнациональный форум эртен.
Марий Эл гыч тушко «ВийАр» тӱвыра кокласе кыл ушем» мер организацийын председательже Алёна Иванова, Марий тӱвыра рӱдер пашаеҥ Надежда Николаева, Марий кугыжаныш университетысе тӱвыра-усталык рӱдер пашаеҥ Яна Семёнова миеныт. Мероприятий нерген кумданрак Алёна Иванова каласкалыш:
– Ме тӱрлӧ калыклан поян элыште илена. Садлан калыкле политике йодыш тачысе илышыште ик эн тӱҥ. Йошкар-Оламак налына. Ончыч тыште марий, руш, татар, чуваш да финн-угор калык-влак иленыт гын, пытартыш жапыште шинчымашым погаш вес кундем гычат ятырын толыныт. Нунын тӱвырашт, илыш-йӱлашт нерген ме мом палена?
Ты йодышым рашемдаш, ваш келшен илаш манын, ончыкылык корным тапташ 2015 ийыште Калык паша шотышто федерал агенствым (ФАДН) почыныт. Тудак ты форумын организаторжо лийыныт.
Ӱмаште тыгай мероприятий Калуга областьысе «Этномир» парк-тоштерыште лийын. Тунам тӱрлӧ мер ушемын еҥыштым ӱжын огытыл ыле гын, тений нунын дене пырля кугыжаныш, муниципал пашаеҥ, журналист-влакымат чумыреныт.
Ты вашлиймаш пеш тӱвыргын эртен. Экскурсий, семинар-влак лийыныт, фильмым ончыктеныт, квиз модмаш дене модыктеныт. Мылам поснак ФАДН-ын пашаеҥже-влакын лудмо лекцийышт келшен. Тимур Цыбиков тӱрлӧ нормативно-правовой документла дене палдарен. Анастасия Берновская калыкле политике дене кылдалтше могай проект улмо да могай эше кӱлмӧ нерген ойлен. Абдулгамит Булатов мониторинг шотышто шуко уым каласкален. Брендинг нерген мутланымашат оҥайын эртен. Тудын дене Российысе калык-влак ассамблейын советшын председательжын икымше алмаштышыже Евгения Михалёва палдарен.
О.МОШКИНА
