Тачысе лаштыкнан унаже Юрий АЛЕКСАНДРОВ дене ӱмаште шыжым Самырык-влак полатыште Марий Эл вуйлатышын грантшым кучыктымо годым палыме лийынна. Тудо Йошкар-Оласе строительный техникумым икмыняр ий ончыч тунем пытарен да шке жапыштыже «WorldSkills International» таҥасымашке Германийыш миен.
— Юрий, илышет чоҥымаш дене кылденат. Тиде профессийлан тыйым кӧ кумылаҥден?
— Ачам. Тудо шкежат чоҥышо лийын. Кызыт — сулен налме канышыште. Ме ачам дене Морко район Изи Корамас ялыштына суртым нӧлтенна. Мый пӧртлан негызым кермыч дене оптенам. Тиде сомыл мылам келшен, сандене строительный техникумыш тунемаш каенам. Ссузым тунем пытарымеке, частный фирмыш пашаш пуренам. Кызыт мый кермычым гына ом опто, канализацийымат ыштем, плиткымат оптем, моло чоҥымо пашамат ыштен моштем. Икманаш, пӧртын негызше гыч тӱҥалын мучаш марте нӧлтен кертам.
— «WorldSkills International» олимпиадышке мийымет дене моло рвезына-влаклан корным почынат манаш лиеш?
— Очыни, лиеш. Мый дечем вара тиде чемпионатыште Евгений Васильев ден Павел Казанцев кугу сеҥымашке шуыныт. А 2013 ийыште республикна тиде олимпиадышке икымше гана ушнен. Шукыжым але палыме огыл. Тӱҥалтыште вийнам Москваште почылтмо чемпионатыште тергыме, техникум гыч кумытын миенна. Тушто нылымше верым налынам. Вара республикысе чемпионатыште «Кермычым оптымаш» номинацийыште сеҥенам. 2012 ийыште Тольяттиште Российысе таҥасымаште ойыртемалтынам. Вара гына Германийыш каенам.
Лейпцигыште эртыше тӱнямбал олимпиадыште мылам чылажат у лийын. Тушто шукылан тунемынам. Кермычшат тушто вес тӱрлӧ, сандене Россий гыч мийыше рвезе-шамычлан тиде конкурсышто мастарлыкым ончыкташ нелырак лийын. Южо инструментшым икмыше гана ужынна манаш лиеш. Кызыт тыгай шотан таҥасымашке коштшо-влакым ончылгоч ямдылат, нуно тӱнямбал стандартлан келшен толшо инструмент, материал дене пайдаланат. Ме тидын шотышто шканна тӱням угыч почынна веле ыле, манаш лиеш.
— Германий тылат мо дене шарналт кодын?
— Лейпциг изи ола. Йошкар-Ола гайрак, тушто моткоч ару, лач кушкылжо шагалрак. Машина-влак шагал кудалыштыт. Еҥ-шамыч утларакшым велосипедым «кушкыжыт». Тыгак мемнам аттракционыш намиеныт. Тушто ик жаплан йоча пагытыш пӧртылынна.
— А ссузыш пашам ышташ кодаш шонымаш лийын огыл?
— Техникумыш пашам ышташ икмыняр гана ӱжыныт, но йоча-влакым туныкташ, очыни, мыйынлык огыл. Мый умылтараш ом йӧрате. Лучо шке шогалын ыштем. А пырля тунемме йолташем, туныктышем-шамыч дене кылым кызытат кучем. Строительный техникумышкат чӱчкыдын унала пурен лектам.
— Спорт дене кылым кучет коеш…
— Школыштак тунеммем годым куржталынам, ече дене коштынам, футбол дене модынам. Кызытат паша деч вара але канышыште йолташем-влак дене любительский футбол командыште модына. Техникумышат ссузын чапшым ятыр гана ече дене таҥасымаште араленам.
— Марла яндарын мутланымет вигак шижалтеш. Тидыже моткоч куандара…
— Авам школышто тӱҥалтыш класслаште туныкта. Тудак мыйым шочмо йылмылан шӱмаҥден. Марла кутыраш нигуштат ом вожыл. Ешаҥмеке, икшыван лиймеке, йочам марла мутланышт манын, тыршаш тӱҥалам.
Лидия ШАБДАРОВА.
М.Скобелевын фотожо.
