Лаштыкнан тачысе унаже - Провой кундемын чолга ӱдыржӧ Анна РЫБАКОВА. Тудо изи годсек театр, вокал кружоклаш да тыгак художественный школыш коштын. Илышыштыже кугу верым хореографийлан ойырен. Пытартыш жапыште марий вургемым подиумыш лукташ тӱҥалын.
– Аня, шукын тыйым чолга еҥ, модель семын палат…
– Звенигово лицейыште тунеммем годымак тӱрлӧ мероприятийыш ушненам. Шкем эреак тӱвыра илыш дене кылдынем ыле, садлан лицейым тунем пытарымек вигак Марий кугыжаныш университетын калыкле тӱвыра да тӱвыра кокласе кыл институтышкыж калык художественный культур направлений дене тунемаш пуренам. Тӱрлӧ моторлык конкурсышто участвоватлаш тыршем. Шарнымашеш «Жемчужина Марий Эл – 2018» республикысе конкурс кодын. Тудо «Российын миссше» конкурсын этапшылан шотлалтеш. Студент пагытыштак шканем у корным, моделингым, ойырен налынам.
– Тидын дене ала лишкырак палдарет ыле?
– Моделинг – тиде сатум рекламироватлымаш, тыгак модельын, ӱдырын але рвезын, образшым чоҥымаш, подиумышто шкем кучен моштымаш. Ты сомылым мый шкет веле огыл ворандарем. Тудлан студент-влакымат шӱмаҥденам. Ме икмыняр направлений дене пашам ыштена, пытартыш жапыште авангард могырыш лупшалтынна.
– Тыйын вет шке модо театретат уло.
– Университетым тунем пытарымек, шочмо олашкем пӧртыльым да ала-мом уым ышташ кӱлмым умылышым. Тыге 2018 ий гыч Звениговысо «Мечта» тӱвыра пӧрт пелен «Аннабель» модо театрым почым. Тудым тӱрлӧ кӧрган шере кампет коробка дене таҥастараш лиеш, молан манаш гын тушто театр, модо, режиссур, сценографий, хореографий, подиум да тылеч моло направлений-влак денат пашам ыштена. Театрыштына кугу рольым костюм модеш, тудо вешалкыште ок кече. Ме тудым калык ончыко луктына, моторлыкшым ончыктена.
– Утларакшым могай модельер дене пашам ыштеда?
– Мый кугу йолташлан Евгения Кошкинам шотлем, тудын дене кылым чак кучем. Чапле коллекцийже-влакым подиумыш командына дене чӱчкыдын луктына. Мутлан, Евгениян коллекцийже дене «Чоткар Патыр» культурно-исторический комплексым чоҥымылан пӧлеклалтше поро кумылым ончыктышо концертыш ушненна, тудынак «Этноузоры – в современный мир» этно-выставкыжым почмаште лийынна. Алина Хорошавинан ошо-шем колекцийжын фотосессийжым эртаренна, Озаҥ олаште «Марийка вышивает узоры» выставкыште, «Марийское наследие», «Радуга над Кокшагой» фестивальлаште лийынна. Икманаш, вияҥына, кушкына. Модо театрланна ик ият уке. Туге гынат шуко конкурсыш, Звенигово олаштына эртыше чыла мероприятийыш ушнаш тыршена. «Кунам ме пырля улына, сеҥаш лийдыме нимо уке» девиз дене илена.
Е.ЁЛКИНА мутланен
