Кум тылзе наре «Поро Марий Эл» РБОО ден Президент грант фондын полшымыж дене Межрегиональный открытый социальный институт начар тазалыкан икшыван еш-влаклан пӧлеклалтше «Йӧратыше ача-ава» клуб» проектым илышыш шыҥдара.
«Кажне шуматкечын «Столичный бизнес колледжыш» шке икшывышт дене пырля ава-влак толедат. Нунылан тушто ятыр мероприятийым келыштарыме. Мутлан, тылзыште кок гана фитнесыш вучена. Тидыже ӱдырамаш-шамычлан поснак шерге. Вет нуно ятыр жапым йочашт дене эртарат. Ты годым шке тазалыкышт, моторлыкышт нерген мондат, манаш лиеш. Тыште нуно кап-кылыштым шуарат, вийым погат.
Посна тӱткылык чон тазалыклан ойыралтеш. Проектыш ушнышо-влак дене психолог Ольга Калмыкова пашам ышта, ятыр тренингым эртара. Нунын чоныштышт нумал коштмо тургыжланымашыштым лыпландараш полша – палдарыш МОСИ-н образований паша шотышто проректоржо Оксана Баланчук.
Шукерте огыл ача-ава-влак деке Йошкар-Ола администрацийын пашаеҥже-шамыч толыныт ыле. Вашлиймаште нуно оласе кудывечылам начар тазалыкан еҥ-влаклан йӧнанракым ыштыме нерген мутланеныт. Лумым эрыктыме йодышымат тарватеныт.
Ваш шинчын мутланымашын лектышыже пеш сай. Вуйлатыше-влак улшо проблеме нерген кумданрак пален налыт да умбакыже тудым кораҥдаш манын тыршаш тӱҥалыт.
О.МОШКИНА
О.Баланчукын фотожо