Эртыше кечылаште Оршанке район Отар ялысе пӱяште 11 да 5 ияш ака- шӱжар-влакын капыштым муыныт.
Латшым шагат кастене ӱдыр-влак, авашт деч йодын, уремыш каеныт. Мӧҥгеш пӧртылын огытыл – вӱд йымаке пуреҥгаеныт. Капыштым верысе-шамыч нӧлталыныт.
Туткар лийме верыш республикысе Следственный комитетын, верысе прокуратурын пашаеҥже-влак кудал миеныт. РФ Следственный комитетын Марий Элысе виктемже Уголовный кодексын «Тӱткыдымылыклан кӧра кок лицалан колаш амалым ыштымаш» 109-ше статьяж дене келшышын уголовный делам тарватен. Туткар кузе лийме амалым рашемдыме паша умбакыже кая.
Шокшо игече шогымылан кӧра, чыла вережак вӱдыш йӱштылаш пурыман огыл. Вӱдыштӧ лӱдыкшыдымылык правилымат палыман. Ачаа-ава-шамыч шке шочшыштлан тидын нерген умылтаренак шогышаш улыт. Икшыве вӱд воктене кугыеҥ деч посна кодшаш огыл.
Тидын нерген регион вуйлатыше Юрий Зайцев МАХ каналыштыже ушештарен. Кызыт республикыште пляж-влакым йӱштылмӧ пагытлан ямдылыме паша кая. Кажне пляжыште утарыше-влак дежуритлаш тӱҥалыт. Йошкар-Олаште йӱштылмӧ пагыт 1 июньышто тӱҥалеш.
Снимкыште: йӱштылмӧ сезон почылтын огыл, а рӱдӧ пляжыште вӱдыш пурышо-влак улыт.
Светлана Носован фотожо.
