Тений 1 сентябрьыште Марий Элыште, Йошкар-Олаште верланыше Бауман лицейыште, республикыште икымше медиа-классым почаш ямдылалтыт. Тушко общеобразовательный организацийласе 9-ше классым пытарыше усталык шӱлышан да журналист лияш кумылан ӱдыр-рвезым тунемаш вучат. Эртыше шуматкечын Бауман лицейыште Почмо омса кече эртен.
Ты кечын тушко погынышо тунемше да нунын дене пырля толшо ача-ава-влакым 10-шо медиа-класс дене кумданрак Марий Эл тӱвыра, печать да калык-влакын пашашт шотышто министр Константин Иванов палдарен. Тыгак кызытсе жаплан республикланна медиа специалист-влакын моткочак кӱлмышт шотышто кундемысе СМИ-н представительышт ойленыт.
Константин Анатольевичын палемдымыж почеш, регионын медиасферже уэмдалт вияҥын толеш, а пытартыш жапыште – поснак писын. Сандене тудлан специалист-влакым ямдылыме сомылым кызытак да школ парт кокла гычак тӱҥалман.
– Бауман лицейын медиа-классыштыже тунемше-влак шинчымашым погымо жапыштак республикнан редакцийлаштыже – «Марий Эл» увер агенствыште але телерадиокомпанийлаште – практикым эртен, пашам ыштен кертыт. Районла гыч толшо-влаклан тӱшкагудышто илаш йӧн ышталтеш. Икманаш, шинчымаш кугорныш тошкалме корно таче тӱҥалеш, – каласен Константин Иванов.
Бауман лицейын генеральный директоржо Григорий Пейсаховичын мутшо почеш, медианаправлений дене почаш палемдыме класслан кызыт тунемме программым ямдылат, журналистике сферыште профессионал-влак дене вашкыл ышталтеш – ӱдыр-рвезе-влакым лач нуно туныкташ тӱҥалыт. Медиа-классыште икмыняр предметым утларак келгын туныкташ палемдыме. Нунын радамыш кызытеш руш ден марий йылме-влакым, литературым, обществознанийым, йот йылмым пурташ палемдыме.
Республикыштына эн кугулан шотлалтше «Марий Эл» увер агентстве» медиахолдингын директоржо Евгений Кузнецов тыге палемден:
– Медиахолдингыштына икмыняр газет савыкталтеш. Ӱдыр-рвезе-влак лишыл жапыштак мемнан дене вашкылым ыштен кертыт. Ме нунылан «Ямде лий» йоча, тыгак самырык тукымлан савыкталтше «Молодёждная жизнь в Марий Эл» газетлаште практике занятийым эртарен кертына.
Медиа-классыш тунемаш пураш кумылан еҥын, мутат уке, аттестатыште «4» деч уда отметке лийшаш огыл, ГИА-мат сайын кучышаш. Эше ик йодмаш: эссем возаш, тушто могай амаллан кӧра медиа-классым ойырымыжо шотышто шонымашым почын пуаш. Ты пашам варажым тунемше приёмный комиссий ончылно очно аралышаш, тыгак диктантым возышаш. Чыла тидым 22 июнь марте ыштен шуктыман, кумданрак Бауман лицейын официальный сайтыштыже пален налаш лиеш.
Г.Кожевникова
