Йошкар-Оласе ола судын 12 февральыште эртыше заседанийыштыже Оршанке районысо администрацийын ончычсо вуйлатышыже Александр Плотников, тудын икымше алмаштышыже Иван Михеев да ISpring IT-компанийым вуйлатыше Юрий Усков шотышто делам онченыт.
Следствийын шонымыж почеш, администраций вуйлатыше ден икымше алмаштышыже район кумдыкышто улшо икмыняр мланде участкым предпринимательлан шулдо ак дене ужаленыт. Чын акышт ден Усковын мыняр теҥгелан налмыж коклаште ойыртем 23 миллионат 773 тӱжем теҥге лийын. Ты амал дене нуно кугу суммо окса шотышто ондалымыштлан титаклалтыт. Тидым шотыш налын, кумыньыштымат 10 февральыште 48 шагат жаплан кученыт.
А 12 февральыште эртыше судын заседанийже деч вара кумыньыштымат мӧҥгышкышт колтеныт. Суд Юрий Усковлан тиде дела шотышто свидетель ден титаклалтше еҥ-влак дене кылым кучаш чарен.
Александр Плотников шотышто суд обвиненийын четлык коклашке шындаш йодмашыжым шуктыде коден. Тудлан республик деч ӧрдыжкӧ каяш чарыме нерген подпискым палемдаш але уке – тидым ончыкыжым следствий орган-влак рашемдат.Оршанке район вуйлатышын икымше алмаштышыже Иван Михеев шотыштат суд обвиненийын тудым четлык коклашке шындаш йодмашыжым шуктыде коден.
Судын пунчалже-влак законный вийыш пурен огытыл, сандене нуным Марий Элын Верховный судыштыжо 3 сутка жапыште обжаловатлен кертыт.Уголовный делам шымлымаш умбакыжде шуйна.
Любовь Камалетдинова
Фотом «Марийская правда» газет гыч налме
