Марий Элым вуйлатыше Юрий Зайцевын кӱштымыж почеш, регионын Калык илышым саемдыме шотышто министерствыжын специалистше-шамыч ужашын мобилизоватлыме шот дене военный службыш налме еҥ-влакын ешышт дене пашам ышташ тӱҥалыныт Нуно мобилизоватлыме гражданин-шамычын ешыштлан лачшымак мо кӱлмым, иждивенийыште йоча-влакын, тыгак опекыш налме-шамычын улмыштым, нунын ийготыштым, кугыжаныш велым могай полыш дене пайдаланымыштым, кредитым тӱлымӧ годым нелылыкым шижмыштым рашемдышашлан социальный паспортым ыштат.
14 октябрь марте мобилизоватлыме чыла 845 гражданинын ешышт шотышто социальный паспортым почмо.
– Ме лекше кажне йодышым радамын лончылаш да нелылыкым лийме семын писынрак кораҥдаш тыршена, – каласкала Марий Элын калык илышым саемдыме шотышто министржын пашажым шуктышо Марина Островская. – Стандарт семын палемдыме мере-влак дене ситышын полшен огына керт гын, тиде пашам кажныж дене посна шуктена. Тидланже ведомство-влак коклаште кылым ыштенна. Сандене Тазалык аралтыш ден Образований да науко министерстве-влак, Паша да калыклан паша верым ситарыме департамент тургыжландарыше йодышлам шке компетенцийышт кышкарыште решатлат.
У Торъял районысо Калыкым социально обслуживатлыме комплексный рӱдерын пашаеҥже-влак социальный паспортым ыштымышт годым мобилизоватлыме Дмитрий З.-ын ачаж ден аважын барак шотан йӧндымӧ пачерыште илымыштым, нунылан вес еҥын полышыжо кӱлмым рашемденыт. 14 октябрь гыч ешлан социальный пашаеҥым пеҥгыдемденыт. Тудо вӱдым конден пуа, илыме верым эрыкта, медицине организацийлашке коштыкта, кугыжаныш велым ойыралтше социальный полышым налаш йӧным ышта.
Тиде район гычак мобилизоватлыме Алексей А.-н ешыжлан социальный паспортым ыштыме годымат ситыдымашым рашемденыт. Спецоперацийыш наҥгайыме гражданинын ачаж ден аваже кугу азапыш логалыныт: тений кеҥежым пӧрт леведышым олмыкташ тӱҥалме деч вара пачерышкышт вӱд пурен, да электровоштыр йӧрдымыш савырнен, обой ден ошемдыш тӧргалтыныт, пырдыж ден туврашат верын-верын каткалалтыныт, илыме верыште вӱдыжгӧ, кажне пӧлемыште йоҥгыт-влак шындыме. Тыгодым пенсионер-шамыч пачерыштым пытартыш гана 2021 ийыште гына олмыктеныт улмаш.
Рӱдерын специалистше-шамыч тиде ситыдымаш дене У Торъял районын администрацийжым палдареныт. Пӧрт леведышым олмыкташ тӱҥалме. Йодышым район администраций ден Калык илышым саемдыме шотышто министерстве контрольыш налыныт.
Ушештарена, мобилизоватлыме граждан-влакын ешышт тургыжландарыше чыла йодышым олаласе да районласе калыкым социально обслуживатлыме комплексный рӱдерлаште рашемден кертыт. Тылеч посна сутка мучко пашам ыштыше Единый диспетчер службыш (88362) 21-00-89 номеран телефон дене йыҥгыртен сеҥат.
М.ИВАНОВА
