Юл кундем кугыжаныш технологий университетыште «Миграционные процессы в Российской Федерации: вызовы, практика, перспективы» Всероссийский научно-практический конференций эртен.
Мероприятийыш Марий Эл правительстве председательын алмаштышыже – тӱвыра, печать да калык-влакын пашашт шотышто министр Константин Иванов, ПГТУ-н ректоржо Игорь Петухов, Марий Элысе МВД-н миграций йодыш шотышто управленийжын начальникшын пашажым шуктышо Ольга Синица, «Ассамблея народов России» организацийын регионысо отделенийжын еҥже, шанчызе-влак да молат лийыныт.
Участник-влак докладыштышт социальный да психолого-педагогический полышым пуымо, мигрант ден верысе калык коклаште умылыдымаш лекмым шижтарыме шотышто ыштышаш паша нерген
да ятыр вес йодышым тарватеныт.
Тений икымше кварталыште йотэлла гыч толшо да гражданстве деч посна улшо 3712 еҥым миграций учетыш шогалтыме. Тидыже ӱмашсе тыгаяк жап дене таҥастарымаште 17,8 %-лан шукырак. Тӱҥ шотышто еҥ-влак Индий, Узбекистан, Таджикистан, Туркменистан, Азербайджан гыч лийыныт. Нунын кокла гыч пелыже утла тунемаш, кажне нылымшыже пашам ышташ толыныт, палдара республикысе МВД-н пресс-службыжо.
Любовь Камалетдинова.
