Марий Элыште илыше инвалид-влаклан санаторий-курорт шотан организацийлаште эмлалташ путёвкым налаш черет шумым кузе палыман?
Н.СЕРГЕЕВ
Волжский район
Йодышлан Россий Федераций Социальный фондын Марий Элысе пӧлкажын пресс-службыштыжо тыге вашештеныт:
– Путёвкым налме черетым Россий Федераций Социальный фондын сайтыштыже рашемдаш лиеш. Тидланже ончыч шке регионым (Марий Эл Республик) ойырен налман, вара «Граждан-влаклан» лончышто «Санаторий-курорт эмлалтмашлан черет» ссылке дене кайыман. СНИЛС-ым ончыктымек, черетын номерже, эмлыме тӧнежын профильже да йодмашым пуымо жап лектыт.
Гражданинын интернет дене пайдаланаш йӧнжӧ уке гын, черетын номержым паша кечылаште 8 гыч 17 шагат йотке республикысе увер службын (8-800-00-02-15) полшымыж дене пален налаш лиеш. Персональный консультаций кодан мут негызеш эртаралтеш. Кодан мут – йыҥгыртыше еҥым пеҥгыдемдыме йӧн, тудо службыш толын кертдыме клиентым алмашта. Кодан мутым Россий Федераций Социальный фондын Марий Элысе пӧлкажын клиент службыштыжо але фондын сайтыштыже налаш лиеш.
Таче кечылан Россий Федераций Социальный фондын Марий Элысе пӧлкаштыже санаторий-курорт шотан организацийлашке эмлалташ каяшлан 2819 еҥ черетыште шога. Тений пӧлкалан путёвкым налашыже 17 миллион теҥгем ойыраш палемдыме.
2022 ийыште Марий Элыште льготан тӱшкаш пурышо еҥ-влаклан путёвкым ситараш федеральный бюджет гыч 21 миллион теҥгем ойырымо. Начар тазалыкан еҥ-шамычлан санаторий-курорт шотан эмлалтмашым эрташышт 810 путёвкым налме, ты чот гыч 660 – санаторий-курорт шотан организацийлашке, 150 – регион деч ӧрдыжкӧ.
Санаторий-курорт шотан эмлалтмаш шинча, шӱлымӧ орган, кочкышым шулыктарыме, вӱр коштмо, эндокринный, нерве, лу-чогашыл системе-влак, тыгак тупрӱдӧ вем дене кылдалтше чер тургыжландарыме годым палемдалтеш.
М.ИВАНОВА ямдылен
