Марий Элын Айдемын праваже шотышто уполномоченныйже Фанис Мухаметгалиев кодшо кушкыжмын республикысе суд пристав ден правам аралыше орган, икмыняр моло организаций вуйлатыше-влаклан докладым ыштыш.
Погынышо-влаклан тудо 2021 ийыште шуктымо пашаж нерген радамлын каласкалыш. Мутлан, ӱмаште уполномоченный 47 личный приемым эртарен. Тудо еҥ-влак дене рӱдолаште веле огыл вашлийын, тыгак районлашкат миен, исправительный, социальный, медицине, моло специализироватлыме учрежденийлаште лийын.
Идалык мучко чылаже 700 утла йодмашым онченыт. Палдарымыж почеш, утларакше пенсионер-влак полшаш йодыныт. Еҥ-влакым тӱҥ шотышто илыме вер да коммунальный озанлык, эрык деч посна кодымо верлаште айдемын праважым шотыш налме да уголовный процесс, правам аралыше, тыгак тергыше органлаште тыршыше-влакын шкеныштым кузе кучымышт, йодмашым шотыш налдымышт, судын лукмо пунчалже дене кылдалтше йодыш-влак тургыжландареныт.
Доклад мучаште Айдемын праваже шотышто уполномоченный Ф.Мухаметгалиев могай органла ден организацийлаште экшык-влак вашлиялтыныт, ончыкыжым нуным шотыш налаш, кораҥдаш да умбакыже ваш кылым кучен пашам ышташ темлыш.
Любовь Камалетдинова
Авторын фотожо
