Кодшо шуматкечын «Тоштерыште йӱд» акций эртаралте. Калык арвер сымыктыш пӧрт-тоштерыш мый ондакак миен толаш палемденам ылят, ты кечын кечывал деч вара тушко тарванышым.
Молан лачшымак ты тоштерыш? Тушто акций жапыште эртараш палемдыме поян программе кышкарыште специальный военный операцийыште улшо салтак-влаклан кум лукан, адакшым марий орнаментан, конвертым ышташ туныктымо мастарлык класс лиеш манын увертарыме ыле.
Тоштерыш мийымекем, акцийын программыже, моло нерген тоштер вуйлатыше Татьяна Алексеевна Матвеева дене мутланышна. Лач тиде жапыште пӧлемыш ӱдырамаш пурыш.
– Палыме лийза. Тиде Людмила Ионовна Матвеева. Тудо уста кидмастар. Мемнан дене шукертсек пеҥгыде кылым куча, – палдарыш тоштер вуйлатыше.
Шонымашем шукталте!
Икмыняр мутым вашталтымеке, мастер-классым тӱҥалаш жап шуо, да ме кокымшо пачашыш кӱзышна. Почешнак изирак ийготан ӱдыр-рвезе-шамыч ача-авашт дене пырля толын шуыч. Людмила Ионовна Йошкар-Оласе 3-шо номеран школышто «труд-технологий» предметым да сӱретлаш туныкта. Тыгак «Умелые ручки» кружокым вӱда. Тушкыжо ӱдыр-шамыч коштыт. Нунын кокла гычак икмынярын туныктышылан мастер-классым эртараш полшаш толыныт ыле.
Мый гын шке семынем ышташ тыршышым, лач могай тӱсан орнаментым кушко вераҥдышашым ойырен налаш гына Людмила Ионовна полшыш. А вара тушко уло кумылем дене «Марий Эл» газетын журналистше семын салтаклан серышым возышым. Тымарте серышым возымо акцийлашке икмыняр гана ушненам гынат, садак эше шкешотан порысым шуктымем моткоч шуын ыле. Пиалешем, шонымашем шукталте!
Шочмо элым йӧраташ кумылаҥда
Тоштер вуйлатышын «Людмила Ионовна моткоч уста кидмастар» манмыжым шотыш налын, мастер-классым эртарен колтымекше, тудын дене мутланышна.
Людмила Матвеева 1988 ийыште Н.К.Крупская лӱмеш Марий кугыжаныш педагогический институтышто «Учитель общетехнических дисциплин и труда» специальностьым налын да, шкеат умылышда, але мартеат нине специальность денак пашам ышта. Тудын уроклашкыже да кружокышкыжо йоча-шамыч кугу куан дене коштыт. Людмила Ионовна мом шкеже ышташ тунемеш, тудымак йоча-влаклан туныкташ тырша. Мутлан, икмыняр ий ончыч эсогыл марий орнаментан аралтышым да кулоным ышташ тӱҥалыныт. Пытартыш жапыште СВО-што улшо-влаклан фетр гыч кече сынан аралтышым да мастарлык классыште туныктымо конверт-серыш-влакымат колтат. Тымарте 30 ий утла жапыште Людмила Ионовна йоча-влакым ургаш, пидаш, тӱрлаш, тыгак курчак-влакым, шер гыч пеледышым да эше мом гына ышташ туныктен огыл?! Тӱдын тӱҥ шонымашыже – йоча-влакым шочмо Марий Элым йӧраташ, марий тӱвыралан, йӱлалан кумылаҥдаш.
Эше ешарынеже
Кидмастар ӱдырамаш нерген ойлаш гын, шкеже молан гына шӱман огыл?! Теве пашаже-влак коклаште тӱрлӧ деч тӱрлӧ сынан курчакше-влак улыт. Мыняржым кевытлаште я интернетыште налын, мыняржым куэм гыч пӱтынек шкеже ышта да нуным урген, тӱрлен чиктеда. Республикысе кажне районын вургемжым «чийыше»-влакат улыт. Тыгодым татар, башкир, икмыняр моло кундемласе «ӱдыр» ден «ӱдырамаш-шамычат» вашлиялтыт. Кагаз гыч конус сынан курчак-влак улыт. Курчак-аралтыш-влакымат ямдыла. Тачысе кечылан 50 утла курчакше погынен.
А кок ият пеле наре ончыч марий тӱран да марий орнаментан этнический сӧрастарыш ден аралтыш-влакым ышташ тӱҥалын. Тыршымыжым акленыт: конкурслаште ик гана веле огыл сеҥышыш лектын!
Ончыкыжым кидмастарын куэм гыч курчак-влакым эше ешарен ышташ, нунылан республикысе район-влакын вургемыштым урген да тӱрлен чикташ да выставкылаште ончыкташ кумылжо уло. Кеч але марте Людмила Ионовнан Тимофей Евсеев лӱмеш калыкле да Калык кидпаша тоштерлаште «Способность творить» (2014), «Куклы в народных костюмах» (2016), «Красота природы» (2018), «Творческий мир педагога» (2023) персональный ончерже-влак лийыныт. Тылеч посна «Выходные с музеем», «Ночь искусств», «Ночь в музее» акцийлашке шуэн огыл ушна да тӱрлӧ мастарлык класслам эртара. А тидлан кидмастарын кумылжат, усталык шӱлышыжат ташлаш ситыше наре улмо шижалтеш.
Любовь Камалетдинова
Авторын да соцкыл лаштык гыч налме фото-влак
