Руэм посёлкысо Шуко профилян лицей-интернатыште Марий Элын ик эн чолга, ушан да талантан икшывыже-шамыч погыненыт: тиде кечылаште Уста йоча-влак дене пашам ыштыме шотышто рӱдерыштыже «УмКа» кеҥежымсе лагерь почылтын.
Ӱдыр-рвезе-влаклан пайдале канышым Марий Эл правительстве председательын алмаштышыже Ольга Бадма-Халгаева, образований да науко министр Лариса Ревуцкая тыланеныт.
Кеҥежымсе школыш молгунамсе семынак тӱрлӧ кӱкшытан таҥасымаште да конкурсышто сеҥыше, призёр-влакым чумыреныт. Нуным Марий кугыжаныш университетын 28 преподавательже физике, математике, химий, руш йылме, биологий дене всероссийский олимпиадылан ямдылаш тӱҥалыт. Занятий-шамыч кызытсе жаплан келшыше лабораторийлаште эртат.
Шинчымашым налме деч посна йоча-влакым тӱрлӧ модыш, экскурсий, квест, мастер-класс, спорт мероприятий-шамыч вучат.
Г.Кожевникова
Фотом Марий Эл Образований да науко министерствын сайтше гыч налме
