Илышыште кеч-мо лиеш гынат, садак чыла эрта.
Ӱдырамашын шканже ак пӧръеҥ дене кылдалтеш. Икте тудым королевым ышта, весе – служанкым. Сандене пӧръеҥым ойырен налме годым ӱдырамаш шке ончыкылыкшым палемда.
Шыде, осал, уда койыш-шоктышан еҥ-влаклан сыраш огеш кӱл. Паледа, Юмо нуным молан шочыктен? Мыланна ончаш да шканна эшеат сайрак лияш тыршаш.
Порылыкым йомдараш огыл манын, кугу мудреч лийман.
Психолог умылтара
Вес йоча-шамыч деч ӧрмалга
Тӱрлӧ амаллан кӧра икшывына садикыш огеш кошт. Вес ньога-шамыч дене содыки кылже лийже, модшо манын, каныш кечылаште йоча площадкыш чӱчкыдын лукташ тыршена. Но тушто тудо нунын дене огеш мод. Ӧрдыжкырак кораҥеш да ончен веле шога. Мӧҥгыштӧ гын пеш кумылзак, чулым, мутланаш йӧратыше.
Тыгай годым мом ыштыман? Кузе лийман?
Елена
Медведево район
Тиде йодышлан психолог И.Михеева тыге вашештен:
– Икшывыда эше изирак да сандене вес йоча-шамыч дене модаш, мутланаш тунем шуын огыл, очыни. Адакшым тыгай кумыл кажнын ик жапыште огеш лек. Тудо тӱрлӧ ийготышто шочын кертеш. Тендан икшывыдат кызытеш весе-шамыч дене кылым ынеж ыште, очыни. Сандене тургыжланаш амал уке.
Каҥаш семын теве мом темлаш лиеш. Тудын таҥашрак икшыван иктаж палымыдам але йолташ ватыдам жапын-жапын мӧҥгышкыда ӱжаш тӱҥалза. Пырля погынымеке, иквереш модса. А кунам нуно сайын палыме лийын шуыт, тунам когыньыштым гына жаплан кодыза. Тек коктын гына иктаж-мом шонен муыт, модыт, мутланат, кылым ыштат.
