Шорык
Тиде арня окса дене кылдалтше йодышым рашемдаш келшыше лиеш. Шийвундым иктаж кугу пашалан кучылт кертыда. Утларак жапым сурт кокласе сомыллан ойыраш темлалтеш. Арня мучаште вучыдымо уверым пален налыда докан.
Презе
Але марте кӧн кумылжым волтенда, тиде еҥ деч проститлаш йодман. Йоҥылышым ыштенда улмаш гын, тӧрлатыза. Иктаж-мо шаланен, тугеже ачалыман. Ончыкыжым тыгай тетла ынже лий манын, эртышым сайын аклен ончалза.
Йыгыр
Амалкалче ден усталык шӱлышан пашам шуктышо-влакым куанле арня вуча. Кугурак кӱкшытыш шуаш манын, у партнёр-шамыч дене вийым иктеш ушаш темлалтеш. Лишыл еҥ-влак дене вашкылда тиде арнян утларак пеҥгыдемеш.
Рак
Ончыкыжым илышдам могай корно дене виктарышашым нине кечылаште рашемдаш перна. Те мо да кузе улмым эшеат саемдышаш верч тыршаш тӱҥалыда але, утыжым тӧчаш огыл манын, «шке пыжашышкыда пурен возыда» да тыгакат йӧра, шонеда.
Лев
Тиде арням ласкан эртарыман. Сандене шӱдыр-влак пашам пӱжалтмеш ышташ огыт темле. Нуно тазалыкым эскераш кӱлмӧ нерген шижтарат. Усталык да чоҥымаш дене кылдалтше сомылым шуктымо годым нелылык вашлиялт кертеш.
Ӱдыр
Илышыштыда тӱрлӧ событий лиеш. Тидлан шуко ӱнарым пытарашда логалеш. Ты амал дене арня мучашлан нойымым шижыда. У еҥ дене палыме лияш огеш темлалт. Шӱмбелда ала-мо шотышто шыдыдам лукмыла чучеш гынат, шкем ласкан кучыза.
Виса
Мом ышташ палемдыме гыч тиде арнян шукыжо шукталтде кодеш. Но тыге лиймылан ӧпкелалтман огыл, а мо улылан куанен моштыман. Сусыргымо, тазалык лунчыргымо лӱдыкшӧ уло. Лишыл еҥда-влак дене умылыдымаш лектын кертеш.
Скорпион
Тыланда йӧршеш палыдыме сферыште кугу пашам тӱҥалаш логалеш. Тидлан кӧра нелылыкым шижыда. Лишыл еҥ-шамыч дене тыматлырак лийман, уке гын вурседылмаш марте шуыда. Ӱдырамаш-влаклан тӱжвал сыныш вашталтышым пурташ темлалтеш.
Пикшызе
Кызыт вий-куат иземмым шижыда, сандене нимом гаяк ыштымыда огеш шу. Тазалык лунчыргаш тӱҥалмеке, вигак врач деке каяш тыршыман. Варалан кодеда гын, нелылык лектын кертеш. У еҥ-влак дене палыме лияш келшыше жап огыл.
Ирказа
Пашаште лектыш лийже манын, мом, кунам да кузе ыштышашым раш палемдыман. Илышышкыда кугу вашталтышым пуртен кертыда. Йоҥылышым тӧрлаташ ида мондо. Чонлан келшыше сомылым шукташ жапым муаш тыршыман.
Вӱд йоктарыше
Тиде арнян те ондак палемдыме пашадам тӱҥалын кертыда. Илышыштыда сай велыш вашталтыш лиеш, шийвундыда ешаралтеш. Еҥын ойжым утыжым колышташ ида тырше. Шке мастарлыкдам да усталыкдам ончыкташ йӧн пуалтеш.
Кол
Тыланда кызыт верыште шинчыман огыл, а чолга лийман. Ала-можо шонымыда семын огеш ышталт. Тидлан кӧра уто роскотыш пурен кертыда. Сандене арнян икымше пелыжым еҥ-влак дене кылым ыштымылан, улшыжым пеҥгыдемдымылан пӧлеклаш логалеш.
Ӱпым пӱчкаш тарваненда гын
15 январь. Прическым вашталташ эн келшыше кече. Тыге тӱжвал сында веле огыл вашталтеш, кумылдат нӧлталтеш. Натуральный гай тӱсыш чиялтыме уда шонымаш деч утлаш, тазалыкым пеҥгыдемдаш полша.
16 январь. Таче ӱпым кузе пӱчмат, чиялтымат огеш келше.
17 январь. Тиде кечын ӱпым пӱчкыда гын, прическо кужу жап куандараш тӱҥалеш. Ӱпым кеч-могай тӱсыш чиялтен кертыда.
18 январь. Ӱпым пӱчкаш сай кече. А теве чиялташ огеш темлалт.
19 январь. Ӱп мучашым веле пӱчкыда гынат, погынышо ӧпке ден тӱрлӧ уда деч утледа. Натуральный чия дене чиялтыме пашаште кӱкшытыш шуаш полша.
20 январь. Ӱпым пӱчкыда гын, тудо пеҥгыдырак лиеш. Ӱп тӱсым вашталташ натуральный чиям гына кучылтман.
21 январь. Таче ӱпым пӱчмӧ деч вара оксада ешаралтеш. Ӱпым молгунамсе деч ойыртемалтше тӱсыш чиялтен кертыда.
Л.Камалетдинова