«Марий Эл» да «Сурт-пече» газет-влаклан возалтше-шамыч коклаште эртарыме лотерей модмаште ик тӱҥ признам – комодым (спонсоржо – «Мастар мари» ООО, вуйлатышыже – Б.Апакаев) – Шернур район Лажъял гыч Иван Волков сеҥен налын.
Кодшо кечылаште Иван Михайловичын Игорь уныкаже пӧлеклан редакцийыш толын ыле.
– Ковам ден кочам, ну, чот куанат ынде! – пелештыш МарГУ-н студентше. – Чечасак нуным куандараш мӧҥгӧ кудалам.
Кас велеш Игорь йыҥгыртыш.
– Моткоч чапле комодым модын налынна. Чылалан пеш кугу тау, – куанжым пайлыш Иван Михайловичын пелашыже, Тамара Ивановна. – Ончыкшымат лудшыда-влакым куандарен шогаш кумылда лийже.
Иван Михайлович ден Тамара Ивановна «Марий Эл» газетым шукертсекак налыт да кажне номержым тӱҥалтыш гыч мучаш марте лудын лектыт.
– Пелашем моткоч пиалан. Редакцийыш колтымо квитанций дене икмыняр гана мешак дене пырчымат, кӱмыж-совламат да молымат модын налынна, – ешарыш шомакшым 65 ияш чолга ӱдырамаш.
Вате-марий Волковмыт 46 ий пырля илат. Кок икшывым ончен-куштеныт, йол ӱмбаке шогалтеныт. Кок уныкашт уло. Иван Михайлович ден Тамара Ивановна сулен налме канышыш лекмеш «Лажъял» ялозанлыкыште тыршеныт. Пӧръеҥ тракторист лийын, а пелашыже фермыште дояркылан ыштен.
Кызытат нуно яра огыт шинче, сурт коклаште тошкештыт, вольыкым ончат. Але марте кок ушкалым, латвич вуй шорыкым ашненыт, а тенийлан ик ушкалым коденыт, тыгак чывым, лудо ден комбым ашнат.
– Вольыкым шагалемдыме дене яра жап моткоч ситышын, сандене газетым лудашак тыршена, – чонжым почо Тамара Ивановна. – Такшым кызыт яллаште вольыкым ашныше шагалемын, газетлан подпискым ыштышыже шукемыт докан? Шочмо йылмына дене савыкталтше газетым лудат да уш-акыл яндарештмыла, капкыл куштылеммыла чучеш. Теат, редакцийыштыда пашам ыштыше-влак, таза, патыр да пиалан лийза, ешыштыда икте-весе дене келшен илыза, коштмаш корныштыда юмо аралыже!
А.Байкова
Авторын да еш альбом гыч налме фото
