Идалыкыште кок гана «Марий Эл» газет редакцийна тендан, пагалыме лудшына-влак, коклаште лотерей модмашым эртара. Тиде гана тудын тӱҥ призше Шернур районысо «Восход» озанлыкын ойырымо презыже лийын. Увертаренна ыле: тудым Параньга район Кугу Пумарийыште илыше Татьяна Лапина модын налын, а ынде вес увер – тиде кечылаште тӱҥ приз озан кидышкыже куснен.
Да эше могай озан! Лапинмыт еш вольыкым ончаш моткоч шӱман улыт: нуно кок ушкалышт, кок тунашт, тынарак презышт, шуко шорыкышт уло. Сандене мемнан тӱҥ призна ӱшанле кидыш логалын манын кертына.
«Марий Эл» газетым ме шукертсек налына. Лотерей модмашыш квитанцийым кажне ийын колтена, но тыгай пиал тымарте эше шыргыжалын огыл. Икымше гана модын налынна да вигак – тӱҥ призым!» – каласыш Татьяна Евгеньевна. Тудо верысе школышто латкум ий пашам ышта, историйым да обществознанийым туныкта, тыгак культорганизаторын сомылжым шукта, а эше – верысе «Йывырте» ансамбльын участницыже. «Мый тӱрлӧ конкурсыш ушнаш йӧратем», – ойла чолга ӱдырамаш.
Татьяна Евгеньевнам да ешыжым тӱҥ призым сеҥен налмышт дене шокшын саламлена!
Г.КОЖЕВНИКОВА
Снимкыште: Татьяна Лапина Лидия аваже, Максим эргыже да еш йолташ Альберт Кузнецов дене пырля – «Марий Эл» газет редакцийыште; тӱҥ приз озан кидышкыже куснен.
