ЛОТЕРЕЙ Марий Эл - 100

Мӱйлан толын, ковыштам конден!

Ме, «Марий Элын» пашаеҥже-влак, шочмо йылмына дене савыкталтше газетлан возалтше-шамыч коклаште кажне пелийыште лотерейым эртарена.

Нунылан эреак чапле пӧлекым ямдылаш тыршена да редакцийыш толмыштым чон вургыж вучена.

Ончыгече Параньга район Элпанур гыч Елизавета Автономова толын ыле. Тудо кум литр мӱйым модын налын.

Елизавета Никандровна 1974 ий годсек «Марий Эл» газетлан подпискым ышта да тудым кушкыжмо ден кугарня еда уло кумылын вуча.

Пелашем дене коктынат лудаш моткоч йӧрата. Тӱҥалтыш гыч мучаш марте, вуйым нӧлталде манме гай, шергалына, кӱлешанжым посна пӱчкын луктын, аралена, — мут ярымжым шуя Е.Автономова. – Газет жапыштыже толын огеш шу гын, моткоч тургыжланена.

Елизавета Никандровна пелашыже Владислав Арсентьевич дене коктын кум йочам ончен куштеныт, йол ӱмбаке шогалтеныт. Кызыт эрге-шешкыже, уныкаже-влак дене пырля илат.

Е.Автономова – пиалан ӱдырамаш. Лотерей дене тудлан икмыняр гана пӧлек логалын. Ончылий, мутлан, носким… Тудым шешкыже поснак йӧратен чиен улмаш.

Елизавета Никандровна 71 ияш, эше моткоч чолга, пашаче да сай озавате. Тидыжым редакцийышкына толмекыже ужын кертна. Пӧлекым налаш толшо шкежат мыланна пӧлекым, ик ведра шинчалтыме ковыштам, конден! М-м-м-м, могай тудо тутло!

Елизавета Никандровна, тамле сийланда шӱм гыч лекше кугу тау! Тазалыкым, кужу ӱмырым да ончыкыжымат мемнан дене пырля лияш тыланена.

А.БАЙКОВА.

Авторын фотожо

Опубликовать в Одноклассники

Добавить комментарий