Российысе калык-влакын тӱвыра поянлыкышт идалык вашеш «Марий Эл» газет редакций «Ик ой дене, ваш келшен» книгам савыктен луктын. Авторжо – тӱвыра йодыш дене редакторна Алевтина Байкова. Тудо ойла:
– Тӱрлӧ национальностян еҥ-влакын ешым чумырымышт да нунын пӱрымашышт, тӱрлӧ калыкым ушышо усталык коллектив-влакын пашашт, марий муро да сем тӱнялан вияҥаш вес калыкын шочшыжо-влакын полшымышт да моло нерген материалым 2021 ий мучко «Марий Эл» газетыште тыгаяк лӱман рубрике дене савыктенам. Лу оҥайракшым, чумырен, посна сборникыш ушаш шонен пыштенам.
Книга брошюро сынан. Статья-влакын вуймутыштым ончалмекак, лудаш кумыл лектеш: «Марий ӱдырым йӧратен да мӧҥгыжӧ шолышт конденыт», «Йот студент рушла мутлана, марла умыла», «Украин ӱдырын вуйшӱдышыжӧ шинчаш перныде ок код» да молат.
Л.СЕМЕНОВА
Тичмаш уверым «Марий Эл» газетын шушаш номерыштыже (2022 ий, 8 апрель)лудса
