УВЕР ЙОГЫН

Школ илыш: Лӱмгечылан чапле пӧлек

Килемар поселкысо  школлан 115 ий темме лӱмеш тений тудым капитально олмыктеныт. Тидын дене туныктышо ден тунемше-влакым саламлаш кодшо изарнян Марий Эл вуйлатыше Александр Евстифеев миен. 

У тунемме ий ты школышто моло вере семынак 1 сентябрьыштак тӱҥалын. Туге гынат ты жапыштак тыште чоҥымо паша каен: спорт ден актовый зал-влакым шотыш конденыт. Кызыт школышто эсогыл кок спортзал уло. Нуно чыла йодмаш ден нормылан келшен толыт.

Килемар школым 1992 ийыште почыныт. Тулеч вара тудым ик ганат олмыктен огытыл. Санденак тений тиде паша вич тылзе ышталтын. Ты  жапыште школын тӱжвал велжым тӱрыс уэмденыт, окнам, омсам, кӱварым вашталтеныт, класслашке, библиотекыш да школын тоштерышкыже у мебельым, специализироватлыме пӧлемлаште лабораторный пашам эртараш кӱлеш оборудованийым налыныт, вентиляцийым, электричестве дене кылдалтше ӱзгар ден арвер-влакым уэмденыт.

— Республиканский программе почеш ӱмаште стадион-площадкым ыштеныт. А ынде школна йомакысе гай лийын. Вес семын каласенат ом керт. Медицине пӧлемым, лаборантскийым, химий, биологий, географий класс-влакым у оборудований-влак дене пойдарыме. Але марте мемнан электрон досканат лийын огыл, а кызыт тудат уло. Ынде тунемше-влакын шинчымашышт эшеат келгырак лиеш, шонена, — Александр Евстифеев дене мутланымыж годым палемден директор Надежда Столярова.

Школым ончен савырнышыжла, республик вуйлатыше пищеблокышто, кочмыверыште лийын да йоча-влакым кузе пукшымо нерген йодын. Тоштерыш, спорт ден актовый заллашке, икмыняр кабинетыш пурен лектын да тунемше-влак дене мутланен. А кызыт ты школышто 579 икшыве шинчымашым пога.

— Таче школышто тулым чӱкташ огыл гынат лиеш, молан манаш гын тудо йоча-шамычын, нунын ача-аваштын, туныктышо-влакын шыргыжмашышт дене волгалтеш. «Транснефть – Верхняя Волга» компаний дене келшен пашам ыштымынам палемденак кодымо шуэш. Юрий Леонидовичлан оксам ойырымылан веле огыл, тыгак шийвундым кушко кучылтмым тергымылан таум ойлена, — журналист-влаклан пуымо интервьюштыжо палемден А.Евстифеев.

Тиде школлан у оборудованийым, мебельым да партым налаш оксам Марий Эл правительстве ойырен. А оралтым капитально олмыкташ да леведышым вашталташ 128 миллион теҥге окса полышым спонсор пуэн.

— Школ ден дошкольный учреждений-влакым ачалыме пашам эртарыме шотышто программына уло. Тыгай пашам ме визымше ий шуктена. Тений кок школым – Рязань областьыште Мосолово селаште да Марий Элыште Килемар поселкышто – олмыктенна. Лачшымак могайым ойырен налшаш йодышым ме келгын шымлена. Кушто условий неле да тудым саемдаш кӱлеш, тидлан компаний оксам ойыра, — палдарен «Транснефть — Верхняя Волга» акционер ушемын генеральный директоржо Юрий Левин.

Школышто олмыктымо пашам мучашлыме лӱмеш ты кечын тыште концертым ончыктеныт. Тудым тунемше-влак ямдыленыт.

Л.Камалетдинова.

Опубликовать в Одноклассники

Добавить комментарий