Урал кундем марий-влак деч поэт да киноартист Йыван Кырлан шочмо верышкыже, Шернур район Купсола ялыш, кугу кӱ толын шуын.
Ты пӧлекым Шернур калыклан Свердловск область Сарсаде ял гыч тусо чолга мер еҥ Леонид Канакаев ден мурызо Эльвира Трифонова, шке машинашкышт прицепым пижыктен конденыт. Тидын нерген соцкыл лаштыкыштыже поэтессе Зоя Дудина увертара.
«Кӱм колтышо да тышке кондышо-влаклан мланде марте вуйнам савена. Ты кӱн чонжо уло гын, тудо мемнан землякна Йыван Кырлан чонжым арала»!» – серен поэтессе.
Ушештарен кодыман, очыни, Марий Элысе тӱвыран сулло пашаеҥже Зоя Дудина Йыван Кырлан шочмо кундемжым чапландарыме дене кылдалтше кугу пашам ворандара. 2021 ийыште тудо «Кырланур – луй модмо вер» лӱмын проектым ямдылен да илышыш шындараш пижын. Проектым ял калыкат, Марисола ял шотан илемын администрацият, районысо кучемай сайлан шотленыт. Тудын кышкарыште Купсолаште 2029 ийлан Йыван Кырла лӱмеш историй да тӱвыра рӱдер лийын шуаш. Тыгак ялым тӱзатат, турист-шамычлан келшышым ыштат. Ты шотыштак «Кырланур» турист маршрутым почшаш улыт. Тудо Йошкар-Оласе кӱртньыгорно вокзал воктеч, Йыван Кырлалан шогалтыме шарныктыш деч, тӱҥалеш да поэтын пӱрымашыж дене кылдалтше оласе икмыняр объектым, Шернур тоштер-ончер комплексым, Купсола ялым, Марисола школ тоштерым авалта.
Купсолаштыже 2009 ийыште актёрын шочмо портшӧ ваштареш шарныктыш кӱмат пыштеныт улмаш. Проект кышкарыштак Йыван Кырлалан пӧлеклалтше тоштер пӧртымат почнешт.
Кӱм лачшымак Свердловск кундем гыч кондымын амалжымат умылтарен кодаш уто огыл, очыни. 1942 ийыште шыжым Кырлам Волжский этап корно дене Свердловский областьысе Краснотурьинск олаш наҥгаеныт да 10 сентябрь гыч Богословский исправительно-трудовой лагерьыш вераҥденыт улмаш. Тушанак Кырлан ӱмыржӧ 1943 ий июль тӱҥалтыште кӱрылтын.
С.Носова
Снимкыште: Урал кундем гыч кондымо кӱ.
Фотом З.Дудинан лаштыкше гыч налме.
