Марий Эл вуйлатыше Александр Евстифеев Россий Федерацийыште регионлам вияҥдыме шотышто правительстве комиссийын штабшын заседанийыштыже лийын. Йодышым Россий правительстве председательын алмаштышыже Марат Хуснуллинын вуйлатымыж почеш видеоконференций режимыште каҥашыме.
Тушто коронавирус инфекций шарлымылан кӧра чоҥышо отрасльлан полшымо мере, тыгак «Лӱдыкшыдымӧ да чапле автомобиль корно», «Илыме вер да оласе среда» национальный проектла дене келшышын федерал бюджет оксам кузе кучылтмо да федерал адресный инвестиций программылам шуктен толмо шумлык мутланыме.
Россий Федераций правительствын кӱштымашыж почеш тений Марий Элыште, «Тазалыкым аралымашым вияҥдымаш» РФ кугыжаныш программе дене келшышын, Перинатальный рӱдерым пужен ышташ да кӱкшӧ технологиян корпус дене кылдаш субсидийым палемдыме. Объектым чоҥаш чылаже 1,5 миллиард теҥге ойыралтшаш, тушечын 794 миллионжылан тений ышталтшаш. Ты объектым чоҥаш 18 мартыште аукцион увертаралтын. Заявке 2020 ий 10 апрель марте налалтеш.
«Лӱдыкшыдымӧ да чапле автомобиль корно» нацпроект дене келшышын, тений республикыштына 70 объектыште паша шукталтшаш. Регионал але муниципал кокласе кӱкшытан автомобиль корнылаште тений 128 километр кужытым пужен ышташ да капитально олмыкташ палемдалтеш. Йошкар-Оласе уремлаште 15,6 километр корно олмыкталтшаш.
Ю.ИСАКОВ ямдылен.
