Марий Элын Тазалыкым аралыме министерствыжын 26 октябрь эрдене увертарымыж почеш, пытартыш суткаште регионнан больницылаж гыч паремше 28 пациентым мӧҥгӧ колтымо, тыгодымак 84 черлым эмлалташ пыштыме. Тыге, теҥгече эрдене республикнан 10 инфекционный стационарыштыже медик-влак чылаже 980 гражданым у коронавирус инфекций да пневмоний деч эмленыт, ты чот гыч 189 черле неле состоянийыште лийын, 17 пациент шодым искусственно вентилироватлыме йӧн дене шӱлен, 386 еҥлан кислород кӱлын.
«Коронавирус: статистика» сайтын 26 октябрь эрденысе данныйже почеш, пытартыш суткаште Российыште COVID-19 дене инфицироватлалтме 17347 у случайым регистрироватлыме, Марий Элыште – 52 случайым. Коронавирусын пандемийже пагытыште республикыштына COVID-19 инфекций дене чылаже 5889 еҥ черланен, 4788 пациент паремын, 63 еҥ колен.
М.ИВАНОВА
