Марий Элысе УФСИН-ыште лум гыч фигурым ыштыме конкурсым иктешленыт.
Таҥасымашке республикысе чыла исправительный колонийыште да Йошкар-Оласе СИЗО-што шинчыше-влак ушненыт, палдара ведомствын пресс-службыжо.
Нунын утларак пашашт У ийлан, Роштолан да Тигр идалыклан пӧлеклалтыныт. Тыгак тений медицине темымат ӧрдыжеш коден огытыл да ик вереже доктор ден «вашкеполыш» машинам» лум гыч чумыреныт.
Конкурсым колтымо фотографий-влакым ончен, заочно акленыт. Икымше верым 4-ше №-ан исправительный колоний гыч осужденный-влак лум Тигрышт дене сеҥен налыныт. Кокымшо верыш ты колонийыште шинчыше-влакак Йӱштӧ Кугыза ден Лумӱдыр пашашт дене лектыныт. Кумшо верым адакат тиде колонийынак ыштыме «танк» ден 3-шо №-ан исправительный колонийын «черкыже» пайленыт. Мо оҥайже, гран-при денат 4-ше номеран колоний гычак 4-ше №-ан отряд палемдалтын.
