Республикыштына илыше йоча-влаклан канаш сай йӧн лийже манын, Марий Эл каныме верлам уэмдыме дене кылдалтше федеральный программыш ушна.
Тыге 2025-2027 ийлаште кундемыштына верланыше тыгай организацийыште илыме ныл у корпусым чоҥаш, тыгак тынарак медпунктым да кум столовыйым уэмдаш палемдыме.
27 ноябрьыште регионым вуйлатыше Юрий Зайцев видеоконференций йӧн дене Россий Федераций правительстве председательын алмаштышыже Дмитрий Чернышенкон вуйлатымыж почеш эртаралтше совещанийыш ушнен. Тушто 2024 ий кеҥежымсе каныме кампаний нерген каҥашеныт да 2025 ийлан ыштышаш пашам палемденыт.
Вице-премьерын мутшо почеш, Россий Федераций президент Владимир Путинын кӱштымашыже почеш йоча лагерь-влакым уэмден вияҥдыме дене кылдалтше программе элыштына 2023 ий гыч илышыш пурталтеш. Тудын полшымыж дене чумыр налмаште 200 тӱжем утла икшывылан сай условийыште канаш йӧным ыштыме. Дмитрий Чернышенко палемден: тӱҥ задаче – тазалыкым пеҥгыдемдыме йоча лагерь-влакын инфрастуктурыштым вияҥдаш, тидлан кугыжаныш-частный партнёрство кышкарыште инвестор-шамычым ушаш.
Икшыве-влаклан каныме да тазылыкым пеҥгыдемдыме организацийласе пищеблок ден медицине блок-шамычым капитально олмыкташ Марий Эллан федерал бюджет гыч ешартыш окса ойыралтеш.
Шушаш ийыште «Радужный» йоча рӱдерыште икшыве-влаклан илашышт 2 у корпусым чоҥаш палемдыме. 2026 ийыште тиде лагерьыштак столовый ден медицине пунктым олмыкташ тӱҥалыт.
Володя Дубинин лӱмеш тазалыкым пеҥгыдемдыме да тунемме йоча рӱдерыште корпус-влакым уэмден чоҥымо пашам ышташ палемдыме, тыгак 2025 ийыште тыште медицине пункт уэмдалтшаш.
2026 ийыште «Пӱнчер» тунемме да тренировкым эртарыме базыштат вашталтыш лиеш. Тушто тачыс жаплан келшыше кок корпусым чоҥаш тӱҥалыт, тыге ешартыш 98 вер почылтеш.
2027 ийыште эмлыме-тазалыкым пеҥгыдемдыме «Чодыра йомак» комплексын медпунктшым, тыгак «Пӱнчер» тунемме да тренировкым эртарыме базын медпункт ден пищеблокшым капитально олмыкташ тӱҥалыт.
Марий Эл Республикым вуйлатышын пресс-службыжын уверже негызеш Г.Кожевникова ямдылен
