«Моя планета» телеканалын лишыл жапыште лекшашлык «Магия вкуса» передачыже марий калык кочкышлан пӧлеклалтеш.
Вӱдышыжӧ Антон Зайцев эл мучко коштеш, тыглай кулинар книгаш пуртыдымо рецепт-влакым кычалеш. Ик выпускыштыжо тудо лачак марий калык йӱла кочкыш дене палдараш да тудым авызлаш тӱҥалеш: тӱрлӧ кӧрган подкогыльым, палышым…
«Марий-шамыч мыйым ончылтеныт! Мо оҥайже, акрет годымак. Мый моткоч подкогыльым йӧратем. Но нуно эре пеш изи гай чучыныт, ала мыйже кугурак улам да. А марий-влак кугу подкогыльым ыштат. Кӧргышкыжӧ мом гына огыт пыште», – палемден Антон Зайцев.
А теве палышым ыштен ончаш манын, съемочный группо лӱмын Морко район Унчо кундемыш миен коштын. Тушто 100 ияш вакшат аралалт кодын да кызытат пашам ышта. Передачын авторжо шкежат ложашым йоҥыштен ончен, тошто марий йӱлам шуктымашке ушнен.
Тыгак телевизионщик-влак мӱкш отарыште лийыныт. Тушто нуным мӱй, команмелна дене сийленыт.
Фотом республикын Промышленность, экономике вияҥмаш да сатулымаш министерствыжын воткыл лаштыкше гыч налме.
