Регион вуйлатыше Юрий Зайцев «Трэвел Лайн Системс» IT-компанийын у офисыштыже лийын.
Компаний Йошкар-Олаште шке бизнесшым 2008 ий гыч ворандара. Тудо унагудо ден турист индустрийлан вияҥаш полша. Клиентше-влак коклаште кугу унагудо сеть-влак улыт. Тӱҥ продуктшо – тиде онлайн йӧн дене турист ден уна-влакым вераҥдыме пашам виктарымаш. Марий Элыште ыштыме программный обеспечений бизнеслан вияҥаш, пашам автоматизироватлаш да парышым налаш полша.
Компанийын генеральный директоржо Александр Галочкин палдарен: «Мемнан принципальный позицийна – кушто шочынат, туштак кӱлеш лийынат. Мемнан платформо дене уло Россий мучко отель-влак пайдаланат, но ме шкенан республикыштак, Йошкар-Олаште, кодына. Мемнан тӱҥ офисна тыштак».
Вашлиймаш годым регион вуйлатыше Юрий Зайцев IT-компанийын налогым тӱлымыжӧ шотышто сай лектышым ончыктышо семын улмыжым палемден. 2024 ийыште гына тудо регионысо бюджетыш 700 миллион теҥге оксам колтен.
«Трэвэл Лайн Системс» компанийыште 700 еҥ пашам ышта, кокла пашадар – 266 тӱжем теҥге. Тушто ышташ йӧнан лийже манын, чыла условий уло. Тӱҥжӧ – IT-отрасльысе специалист-влаклан шкенан денак кодаш паша вер ышталтын. У офисыште ешартыш паша вер лектеш. А тидыже утларак парышым да чыла кӱкшытан бюджетыш налогым налаш йӧным ышта.
Марий Эл вуйлатышын пресс-службыжын уверже негызеш Светлана Носова ямдылен.
Снимкыште: у офисыште вашлиймаш годым.
