Таче Йошкар-Оласе кӱртньыгорно вокзал воктене Турист-увер бюро почылтын.
Тудым ышташ шонымаш дене кылдалтше проект «Туризм и индустрия гостеприимства» национальный премий кышкарыште единый субсидийым ойырымаште «Турист-увер рӱдер-влакым налмаш да ыштымаш» номинацийыште сеҥышыш лектын. Тидлан ойырымо шийвундын кугытшо – 2 миллион теҥге. Тыгай субсидийжым Россий Федерацийын Экономике вияҥмаш министерствыже тений икымше гана палемден.
Бюром торжественно почмашке экскурсовод-влакат кумылын ушненыт. Мероприятийын программыже гармонь шоктымо почеш йоҥгалтарыме марий муро, куштымаш гыч тӱҥалын. Вес семынже лийынжат ок керт, вет марий рӱдола кундемнан, калыкнан, тудын тӱвыраж ден йӱлажын чурийже манашат лиеш.
Тыгай турист-увер бюром ышташ шонымаш республикыште туризм дене кылдалтше пашам ворандарен толшо чолга марий предприниматель-влак Николай Мамаев ден Владимир Аптулаевын шочын. Палемдымышт почеш, нунын кевытлашке толшо турист-влак деч олаштына кушто канаш, мом ончалаш лийме, сувенирым налме шотышто шуко йодыш пура, сандене тыгай бюро моткоч кӱлеш. Эн ончыч предприниматель-влак ола администрацийыште лийыныт. Олам тӱзатыме ончыкылык генплан почеш кушто, могайрак сынан тыгай рӱдерым вераҥдаш лийме нерген мутланен келшеныт. Бюрон оралтыже петырыме сынан, вошткойшо павильон гай. Илен-толын лач тыгайрак сынан павильон-влак моло уремыштат лийыт манын, ӱшан уло.
У турист-увер бюрош пурен, республик але ола мучко экскурсий-влакым заказатлаш лиеш. Вокзал воктенак вераҥмыже олашкына толшо турист-шамычлан поснак йӧнан. Тыште тыгак национальный ойыртеман тӱрлӧ сувенирым, республикыште ыштен лукмо чайым, кампетым, тӱрлӧ пастилам пӧлеклан налын кертыт. Шинчаш «Шере костенеч» манме кампет коробкат, «Йошкин пырыс» мармелад, Йошкар-Ола шыл комбинатын тушёнкыжо, вуйдеҥге чай пернышт.
Кофе-машинкат уло. Сувенирым луктын пуышо автомат нерген поснак ойлен кодымо шуэш. Тыгайже олаштыжат икте веле, каласышт бюро оза-влак. Тудым лӱмын заказатленыт. Автомат кӧргыш вераҥдыме тӱрлӧ сувенир гыч, келшышыжым ойырен налын, вигак банк карт дене тӱлен налаш лиеш.
Турист-увер бюром почмашке тыгак республикын Спорт да туризм министерствын турист пашам виктарыме шотышто пӧлкан советникше Снежана Кошкина, Экскурсовод-влакын ассоциацийыштын еҥже Михаил Дубовский толыныт. С.Кошкинан ойлымыж почеш, тений гына Марий кундемыш 1 миллион утла турист ден экскурсант толын каен. Ончыкыжымат олашкына толаш ямдылалтше турист-шамычлан чын уверым пуэн шогышо ты бюро сай эҥертыш лиеш.
Светлана Носова
Снимкыште: турист увер рӱдерым почмо годым.
Авторын фотожо.
