Марий Эл правительстве председательын икымше алмаштышыже Дмитрий Троицкий унагудо услугым пуышо организаций-влакын пашаштым каҥашыме йодышлан пӧлеклалтше совещанийым эртарен.
Мутланымаш «2023-2024 ийлаште туризм да унам вашлийме индустрий» национальный проектын илышыш шыҥдаралт толмыж нерген каен. Проект дене келшышын, республикылан 111,3 миллион теҥге федерал окса ойыралтын. Тышеч 78,4 миллионжым турист-влакым вераҥдаш капитальный огыл модульный оралтым ышташ да 32,9 миллионжым единый субсидий семын колтымо.
Дмитрий Троицкийын ойлымыж почеш, Марий Эл правительстве унам вашлийме сферым вияҥдашак тырша. 2023 ий гыч турист отрасльым финансироватлымаш палынак кушкын. Кодшо ийын 43,5 миллион теҥге ойыралтын гын, тений – 44, 5 миллион.
Туризм отрасльым вияҥдымаш у паша верымат ышташ полша, налогат ешаралтеш. Кодшо ийын Марий Элыш 1 миллион наре турист толын гын, тений кандаш тылзе жапыште гына нунын чотышт 800 тӱжемыш шуын, тышеч 155115 еҥже мемнан унагудылаште илен каеныт.
«Туризм да унам вашлийме индустрий» нацпроект кышкарыште Экономике вияҥмаш министерстве 6 декабрь марте 2025-2027 ийлалан туризмлан единый субсидийым ойырымо шотышто конкурс шот дене ойырен налме пашам эртара. Субсидийжым субьект-влак коклаште шеледат. Тиде кажне регионлан приоритетный направленийлан шийвундым кучылташ йӧным почеш. Кызыт марий Эл федерал финансированийым налаш манын йодмашым ямдыла.
«Туризм да унам вашлийме индустрий» нацпроектым илышыш шыҥдарен толмо нерген мутланымаш тыгак РФ Правительствын туризмым вияҥдымаш шотышто комиссийыштыже каен. Тудым правительстве председательын алмашышыже Дмитрий Черншенко вӱден. Видеойӧн дене тушко Марий Эл вуйлатыше Юрий Зайцев ушнен.
Россий Экономике вияҥмаш министерствын полшымыж дене республикыште «Яльчик» каныме базым уэмден тӱзатыме. Тушто жаплан келшыше инженер инфраструктуран 8 модульный пӧртым нӧлтымӧ, «Мариленд» каныме базыштат номерной фондым 24-ытлан шукемдыме. «ВӱДЛЕНД» спортивно-тазаҥдарыме рӱдерын модульный секторжо» инвестиций проектат илышыш шыҥдаралтеш. Тушто тыгак 28 номерым ыштыме. «ЗаАзьяково» экофермыште федерал шийвундо кӱшеш ешартыш 8 номерым пашаш колтымо.
Йошкар-Олаште кугыжаныш субсидий кӱшеш Турист-увер рӱдер ышталтеш. Тыгак марий рӱдолаштына тений кокымшо гана регион-влак кокласе кӱкшытан «Йошка еш» гастрономий, Чыкмаште «Бендериаде» мыскара да койдарчык фестиваль-влакым эртарыме. Национальный турист маршрут-влакым вияҥдаш виктаралтше общественный инициативе-влакланат полыш ойыралтеш. Тений Марий Эллан ойырымо единый субсидийын кугытшо 32,9 миллион теҥгеш шуын.
Марий Эл правительствын пресс-службыжын уверже негызеш Светлана Носова ямдылен.
